काठमाडौं । नेकपा (एमाले)का उपमहासचिव तथा संसदीय छानबिन समिति सदस्य प्रदीपकुमार ज्ञवालीले छानबिन समितिले संसद्मा बुझाएको प्रतिवेदन अपूर्ण रहेको बताएका छन् ।

शुक्रबार प्रतिनिधिसभाको बैठकपछि संसद् भवनबाहिर सञ्चारकर्मीहरूसँग बोल्दै ज्ञवालीले सत्ता पक्षका सांसदहरू करका दर हेरफेर गर्न अनधिकृत व्यक्ति प्रवेशबारे अध्ययन गर्ने सबै औजार प्रयोग गर्न सहमित नभएको बताए ।

ज्ञवालीले छानबिनका लागि अर्थमन्त्रालयले बजेट निर्माणको अन्तिम दिन करका दर हेरफेर गर्ने बस्ने कर्मचारीको नामसमेत उपलब्ध नगराएको बताए । उनले वास्तविक प्रमाणहरू जुटाएर यथार्थ प्रतिवेदन ल्याउने योजना भएपनि सत्तापक्षका सांसदहरू एक मत नहुँदा वास्तविक प्रतिवेदन आउन नसकेको बताए ।

उनले अर्थ मन्त्रालयजस्तो स्थानमा सीसीटीभी फुटेज सुरक्षित नहुनुमा प्रशासनिक र राजनीतिक नेतृत्व नै चुकेको दाबी गरे ।