काठमाडौं । सेतो मच्छिन्द्रनाथको रथयात्रा हुने काठमाडौंको रानीपोखरी प्रहरी कार्यालय भवन र आकाशेपुलबीचको बाटोमा बनाइएको कंक्रिटको संरचना भत्काइएको छ ।

सेतो मच्छिन्द्रनाथ रथयात्रा व्यवस्थापन समितिका अध्यक्ष निलकाजी शाक्यलगायत स्थानीयले कंक्रिट संरचना बनाउने कामको विरोध गरेका थिए । संरचना भत्काउन उपत्यका विकास प्राधिकरणलाई वडा नम्बर २८ का वडाध्यक्ष भाइराम श्रेष्ठले पत्र पठाएका थिए ।

बाटोमा हिँड्ने पैदलयात्री र रथयात्रालाई असर गर्ने गरी बनाइएको संरचना हटाउनुपर्ने भन्दै स्थानीयले विरोध गरेका थिए ।

स्थानीय तहलाई नै जानकारी नदिएर बनाइएको संरचना वडाकै समन्वयमा भत्काइएको सम्पदा संरक्षणकर्मी गणपतिलाल श्रेष्ठले जानकारी दिए ।

“उहाँहरूले भोलिसम्म पूर्ण रूपमा भत्काउने भन्नुभएको छ,” उनले भने ।