काठमाडौं । सात विद्यार्थी संगठनले त्रिभुवन विश्वविद्यालयले प्रश्नपत्र दोहोरिएको विषयमा छानबिन गरी सत्यतथ्य बाहिर नल्याए आन्दोलन गर्ने चेतावनी दिएका छन् । 

विद्यार्थी संगठनका नेताहरूले आज संयुक्त विज्ञप्ति जारी गर्दै उच्चतरीय छानबिन समिति गठनको माग गरेका हुन् । 

“पहिले अर्थशास्त्र विषयको प्रश्नपत्र दोहरिएको र जसको छनबिन समितिको प्रतिवेदन सार्वजनिक नगरी सामान्य कारबाही गरेकोमा सो समितिको प्रतिवेदन सार्वजनिक गर्न र दोषीउपर कारबाही गरी अहिले पुनः विश्वविद्यालले व्यवस्थापन संकायमा लिएको परीक्षाको प्रश्नपत्र दोहरिएको र निजी कलेजको आन्तरिक परीक्षाको प्रश्नपत्रसँग हुबहु मिलेको विषयमा त्रिविको गम्भीर लापरबाही भएकाले यो छानबिन गर्न अवकाश प्राप्त प्रोफेसरको नेतृत्वमा उच्चस्तरीय छानविन कमिटी गठन गरी सत्यतथ्य बाहिर ल्याइयोस र विश्वविद्यालयका साझा मुद्दालाई त्रिवि प्रशासनले सरोकारवाला सबै पक्षसँग छलफल गरी उचित निकास निकाल्न पहल गरोस् अन्यथा संयुक्त विद्यार्थी संगठन कडा आन्दोलनमा जान बाध्य हुनेछौँ,” विज्ञप्तिमा भनिएको छ । 

विश्वविद्यालयमा देखिएका बेथिति समाधानका लागि नेकपा (एकीकृत समाजवादी) निकट अनेरास्ववियूको ६ दिन जारी आमरण अनशनमा ऐक्यबद्धता जनाएका छन् । अनशनरत विद्यार्थी नेताहरूको जीवनरक्षाको माग समेत गरिएको छ । अनशनरत विद्यार्थीहरूको स्वास्थ्यमा खेलबाड नगर्न उनीहरूको आग्रह छ ।