काठमाडौं । ङादी ग्रुप पावर लिमिटेडले यही साउन १८ गतेदेखि १ः१.५० अनुपातमा हकप्रद सेयर निष्कासन गर्ने भएको छ । कम्पनीले हाल कायम चुक्तापुँजीको आधारमा १५० प्रतिशत हकप्रद सेयर जारी गर्न लागेको हो ।

जसअनुसार कम्पनीले १०० रुपैयाँअंकित दरका एक करोड ६ लाख तीन हजार ९८६ कित्ता हकप्रद सेयर जारी गर्ने जानकारी गराएको छ । हाल कम्पनीको चुक्तापुँजी ७० करोड ६९ लाख ३२ हजार ४०० रुपैयाँ रहेको छ । १५० प्रतिशत हकप्रद सेयर जारी गरेपश्चात् कम्पनीको चुक्तापुँजी एक अर्ब ७६ करोड ७३ लाख ३१ हजार २५० रुपैयाँ पुग्नेछ  ।

यो हकप्रद सेयर आउँदो भदौ ७ गतेसम्म बिक्रीमा रहने जनाइएको छ । हकप्रद सेयर निष्कासन प्रयोजनका लागि कम्पनीले असार २० गते एक दिन बुक क्लोज गरिसकेको छ । बुक क्लोजको आधारमा असार १९ गतेसम्म कायम सेयरधनीहरूले मात्र यो हकप्रद सेयरमा आवेदन दिन सक्नेछन् ।

हकप्रद सेयर निष्कासनका लागि गराइएको रेटिङमा क्रेडिट रेटिङ एजेन्सी केयर रेटिङ्स नेपालले वित्तीय दायित्व पूरा गर्ने मध्यम जोखिमको संकेत गर्ने केयर एनपी डबल बीप्लस आईएस रेटिङ प्रदान गरेको छ ।

यो हकप्रद सेयरको बिक्री प्रबन्धकमा सिद्धार्थ क्यापिटल लिमिटेड रहेको छ । बिक्री प्रबन्धकसँगै सिद्धार्थ बैंकका विराटनगर, वीरगन्ज, पोखरा, बुटवल, नेपालगन्ज, धनगढी र सुर्खेत शाखा कार्यालयबाट पनि आवेदन दिन सकिनेछ । साथै, सी–आस्बा सेवामा सहभागी सम्पूर्ण बैंक तथा वित्तीय संस्था र तिनका शाखा कार्यालयहरूसँगै मेरोसेयर सफ्टवेयर र एपमार्फत पनि आवेदन दिन सकिनेछ ।