काठमाडौं । काठमाडौं महानगरपालिकाका मेयर बालेन्द्र शाह (बालेन)ले कुहिने र नकुहिने फोहोरलाई भान्छामै छुट्ट्याउन नगरवासीलाई आग्रह गरेका छन् ।

फोहोर वर्गीकरणका लागि सचेतना फैलाउन महानगर वातावरण तथा कृषि विभागले शनिबार आयोजना गरेको कार्यक्रममा भेटिएका नागरिकसँग कुरा गर्दै उनले यस्तो आग्रह गरेका हुन् ।

महानगरले भोलिदेखि कुहिने र नकुहिने फोहोरलाई छुट्टाछुट्टै दिनमा र छुट्टाछुट्टै सवारीसाधनमा संकलन गरिने जनाएको छ ।

यसका लागि फोहोर उत्पादकले तोकिएको दिनमा तोकिएबमोजिम प्रकृतिको फोहोर मात्र निकाल्नुपर्नेछ । यदि, कसैले मिसिएको फोहोर निकाले एकपटकमा ५०० रुपैयाँसम्म जरिवाना हुने विभागका प्रमुख सरिता राईले जानकारी दिइन् ।

आजको सचेतना कार्यक्रम भित्री वडालक्षित थियो । काठमाडौंका १८, १९, २०, २४ र २५ नम्बर वडामा पुगेर नागरिकलाई महानगरको फोहोर वर्गीकरणसम्बन्धी कार्यक्रमका बारेमा जानकारी गराइएको थियो ।

जैविक फोहोरबाट गड्यौले वा कम्पोस्ट मल बनाएर कौसी तरकारी वा करेसाबारीमा प्रयोग गर्न महानगरको अनुरोध छ । नकुहिने तर पुनः प्रयोगमा आउन सक्ने फोहोरलाई पुनः प्रयोग गर्न सकिन्छ । पुनः चक्रिय फोहोर कवाडी संकलकलाई बेचेर आय–आर्जन गर्न सकिने जनाइएको छ ।