काठमाडौं । नेपालको चारदिने भ्रमणमा आएका चिनियाँ कम्युनिष्ट पार्टी (सीपीसी) का विदेश विभाग प्रमुख लिउ चियानछाओले अन्तिम दिनमा बीपी संग्राहलय पुगेर गरेको अवलोकनलाई नेपालको राजनीतिमा महत्वका साथ हेरिएको छ ।

नेपाल भ्रमणमा रहेका लिउले बुधबार संग्रहालय पुगेर एकघण्टा बढी बिताएका थिए ।

संग्रहालय प्रमुख परशुराम पोखरेल र कूटनीतिज्ञ दिनेश भट्टराईले बीपी संग्रहालय, बीपीको समयमा चीनसँगको सम्बन्ध, त्यहाँ रहेका दस्तावेजका बारेमा बताएका थिए ।

भेटमा सहभागी भट्टराईले चीनले यसअघिभन्दा कांग्रेसलाई बढी महत्व दिएको बताउँछन् ।

“कांग्रेसलाई अलि नजिकबाट बुझ्न खोजेको देखिन्छ,” उनले भने, “ कांग्रेसको इतिहास बीपीको लिगेसी जान्न खोजेको देखिन्छ । बीपीको योगदानलाई अपनत्व लिन खोजेको देखिन्छ । नेपालको कम्युनिष्ट पार्टीसँग सम्बन्ध चाहिँ राख्ने तर आन्तरिक मामिलामा हस्तक्षेप नगर्ने भन्ने उनीहरुको कुरा छ । तर, त्यसको विपरीत यहाँ कम्युनिष्ट पार्टी फुट्न लाग्दा घर घर गएर चिनियाँ राजदूतले नेताहरुको जस्तो व्यवहार देखाइन् । अहिले त्यस्तो पाइएन । सम्बन्ध सुधार गर्न चाहेको देखियो । जुनै पार्टी आए पनि नेपालको एक चीन नीति फरक पर्दैन भन्ने विश्वास गरायौँ । कसैलाई लिएर हिँड्नुभन्दा सबैलाई लिएर अघि बढौं समदुरीको सम्बन्ध राखौँ भनेजस्तो देखिन्छ । नामधारी कम्युनिष्टहरूको विश्वास रहेन । यिनीहरुले चीनको विश्वास अनुसार काम गरेनन् । चिनियाँहरुले बाहिर भनेभन्दा पनि केही बढी गर्न खोजेको हो कि भन्ने पनि देखिन्छ ।”

उनले नेपालको राजनीतिमा कांग्रेस महत्वपूर्ण शक्ति हो भन्ने सन्देश चीनले दिएको उनको बुझाइ छ ।

लिउ बीपी संग्रहालय पुगेका बेला बाह्रखरीले लिएका केही तस्बिर :