काठमाडौं । नेकपा माओवादी केन्द्रका राष्ट्रियसभा सांसद नारायणकाजी श्रेष्ठले राष्ट्र बैंकका गभर्नर महाप्रसाद अधिकारीलाई पदबाट राजीनामा दिन आग्रह गरेका छन् । बिहीबारको राष्ट्रियसभा बैठकमा उनले विवादित गभर्नर अधिकारीले राजीनामा दिनुपर्ने बताएका हुन् । 

“विवाद भइसक्यो । अन्योल भयो भनेर उहाँले पदबाट राजीनामा दिनु वेश हुन्छ । विधि र मूल्य लागु हुनुपर्यो,” उनले भने । 

उनले एमालेको अर्थ तथा योजना विभागका सदस्य एम अधिकारी र गभर्नर अधिकारी एकै हो भन्ने चर्चा भइरहेको बताए । “सबैले उहाँ नै हो भनेर भनिरहेका छन् । महाप्रसाद अधिकारी एम अधिकारी त्यही जिल्लाको अर्को को होला त ? उहाँ नै हुनुहोला होला भनेर लागेको छ,” उनले भने, “नेकपा एमाले वा गभर्नर अधिकारीले त्यसमा विश्वसनीय खण्डन गर्नुभएको छैन । गर्न सक्ने स्थिति पनि होला किन नहोला भन्ने गम्भीर छ ।”

उनले एमाले र अधिकारीले एम अधिकारी भन्ने व्यक्ति भए कागजात निकाल्न पनि चुनौती दिए । “होइन भने पुष्टि गर्ने कागजात चाहियो । ०७३ सालको गभर्नर हो, अहिलेको चाहीँ अर्कैै हो भन्ने पुष्टि गर्नुपर्यो,” उनले भने ।