काठमाडौं । चलचित्र ‘प्रकाश’ले प्रचार सुरु गरेको छ । प्रचारलाई आक्रामक बनाउने क्रममा ‘प्रकाश’ले देशका ठूला ६ सहरमा प्रमोशनल कार्यक्रम गर्ने भएको हो । 

युवा पुस्ताका कमेडियनहरूको साथमा हुने प्रमोशनल टुर असार ३१ (भोलि) चितवनको भरतपुरबाट सुरु हुनेछ । भदौ ५ गते काठमाडौंमा आएर समापन हुनेछ । 

निर्माण पक्षका अनुसार असार ३१ र ३२ गते चितवनको भरतपुर, साउन ६ र ७ बुटवल, साउन १३ र १४ पोखरा, २० र २१ बिराटनगर, २७ र २८ हेटौडाँमा र भदौ ३, ४ र ५ गते काठमाडौंमा कार्यक्रम आयोजना हुनेछ ।

चलचित्रले प्रमोशनल कार्यक्रमका लागि बटुवा कमेडी र कमेडी टुकटुकसँग सहकार्य गरेको हो । ‘टेबल मुनीबाट’ नाम दिइएको प्रमोशनल कार्यक्रममा चलचित्रका नायक प्रदीप खड्कासहित अन्य कलाकार र केमेडियनहरू आदर्श मिश्रा, आयुस श्रेष्ठ, एलेन जंग राणा, आशिष घिमिरे र पुजन अधिकारी सहभागी हुनेछन् । काठमाडौंमा अन्य कलाकारहरू पनि सहभागी हुनेछन् ।

भदौ १० गते प्रदर्शन हुने दिनेश राउत निर्देशित चलचित्रमा प्रदिप खड्का, दिया मास्के, रेणु योगी, प्रकाश घिमिरे, निरज पन्थी, गोविन्द सुनुवार, रामबाबु रेग्मी, लोकेन्द्र लेखक, दीपेन्द्र शाहीलगायत कलाकारको अभिनय छ ।

चलचित्रमा विकास सुबेदीको लेखन, राजेश श्रेष्ठको छायांकन, जीवन थापाको सम्पादन, सुवास भुषाल, दीपक शर्मा, तारा प्रकाश लिम्बू र एलिस कार्कीको संगीत रहेको छ । उत्तम न्यौपानेको साउण्ड डिजाइन र शैलेश श्रेष्ठको पाश्र्व संगीत रहेको चलचित्रका निर्माता महेन्द्र अधिकारी हुन् ।