काठमाडौं । नेपाली कांग्रेसको प्रदेश नम्बर–१ का सभापति उद्धव थापाले आउँदो निर्वाचनमा गठबन्धनलाई निरन्तरता दिइनुपर्ने बताएका छन् । सोमबारदेखि सानेपमा सुरु केन्द्रीय कार्यसमितिको बैठकमा उनले यस्तो धारणा राखेका हुन् ।

“एक नम्बरमा एक नम्बर नै बनेको छ । यसको कारण गठबन्धन नै हो । कतिपय ठाउँमा गठबन्धन भयो, कतिपय ठाउँमा बनेन,” उनले बैठकमा भने, “गठबन्धनकै जगमा कांग्रेस पहिलो पार्टी बनेको छ । अब आउने चुनावमा पनि ती दलहरूबीच गठबन्धन बनाएर जानुपर्छ ।”

उनले गएको स्थानीय तह निर्वाचनमा गठबन्धनलाई पर्याप्त व्यवस्थित गर्न नसकिएको पनि बताए । निर्वाचनपछि समस्या बढेर गएको र त्यसलाई हल गरेर जानुपर्ने उनको भनाइ छ ।

“एक नम्बर प्रदेशमा पहाडी जिल्लामा गठबन्धन सहमतिका आधारमा बन्यो । पहाडमा गठबन्धन बलियो भयो । मधेसमा हुन सकेन । मोरङमा झन् फितलो भयो । हाम्रै साथीहरू गठबन्धनको विपक्षमा रहनुभयो । महानगरको कार्यपालिका चुनावमा त्यसको झल्को देखियो । गठबन्धन व्यवस्थित बनाउन सकेनौँ ।”