जनकपुरधाम । एकै व्यक्तिलाई दोहोरो नागरिकता दिन सिफारिस गरेका वडाध्यक्ष र सचिव फरार भएका छन् । जिल्ला अदालत धनुषाले पक्राउ पुर्जी जारी गरेपछि जनकपुरधाम उपमहानगरपालिका–८ का निवर्तमान वडाध्यक्ष रमेश ठाकुर र सचिव माधव राय फरार भएका हुन् ।

उनीहरूले मुखियाट्टी मुसहरनिया गाउँपालिका तुलसियाही जब्दीबाट एउटा नागरिकता लिइसकेका आनन्द मिश्रलाई पुनः नागरिकताका लागि सिफारिस गरेका थिए । अदालतले उनीहरूलाई नागरिकतासम्बन्धी कसुर मुद्दामा पक्राउ पुर्जी जारी गरेको हो ।

उनीहरूको सिफारिसमा दोहोरो नागरिकता लिएका आन्नद यही असार पहिलो साता पक्राउ परेका थिए । उनीमाथि अदालतबाट म्याद थप गरी प्रहरीले अनुसन्धान गरिरहेको छ ।

पक्राउ परेका आनन्दसँग भारतीय मतदाता कार्ड पनि रहेको अनुसन्धानबाट खुलेको छ । प्रहरीले उनलाई पक्राउ गरी अनुसन्धान गर्दा दुई नेपाली र एक भारतीय मतदाता परिचयपत्र समेत फेलापरेको बताइएको छ ।

उनले ०७० साल जेठ १९ गते जिल्ला प्रशासन कार्यालय धनुषाबाट नागरिकता प्राप्त गरेका थिए । उनले नै ०७८ मंसिर १७ गते आनन्दमोहन शरणको नाममा धनुषाबाटै अर्को नागरिकताका लिए । पहिलो नागरिकतामा ठेगाना मुखियाट्टी मुसहरनिया गाउँपालिका र दोस्रो नागरिकता जनकपुरधाम उपमहानगरपालिका देखिन्छ ।

दुवै नागरिकतामा उनको नाम, जन्ममिति र स्थान फरक–फरक देखाइएको छ । पहिलो नागरिकतामा बुवाको नाम पवन मिश्र उल्लेख छ । अर्को नागरिकतामा बुवाको नाम देवशरण राखिएको छ । दुवै ठाउँबाट लिएको नागरिकतामा आनन्दकै फोटो छ ।

भारतको निर्वाचन आयोगबाट जारी मतदाता सूची र उनले बनाएको मतदाता परिचयपत्रमा पिताको नाम पवन मिश्र र आफ्नो नाम भवेश मिश्र उल्लेख छ । ती कार्डमा पनि आनन्दकै फोटो छ । उनले दुवै ठाउँबाट लिएको नेपाली नागरिकता वंशजका आधारमा दिइएको हो । उनी जानकी विहार कुण्ड मन्दिरका महन्तका सहयोगी थिए ।

यस्तै, भारतीय नागरिकलाई नागरिकता दिएको अभियोगमा धनुषाधाम नगरपालिका–२ का निवर्तमान वडाध्यक्ष प्रभुनारायण साह र सचिव ध्यानी यादवमाथि पनि जिल्ला अदालतमा मुद्दा चलिरहेको छ । उनीहरूमाथि किर्ते कागजात भए पनि घुस लिएर भारतीय नागरिक सुनील राईलाई नागरिकता दिन सिफारिस गरेको अभियोग छ । सुनीलले कैद भुत्तानी गरिसकेका छन् ।