काठमाडौं । लुकास सिल्भाले चार गोल गरेको खेलमा मलेसियन सुपर लिग क्लब पेनाङ एफसीले शनिबार टुवान याङ टेरुतमा (टीवाईटी) कपमा नेपालको शीर्ष डिभिजन लिगको क्लब न्युरोड टिम (एनआरटी) लाई ५–० ले हराएको छ ।

सहिद स्मारक ‘ए’ डिभिजन लिगको क्लब एनआरटीको यो लगातार दोस्रो हार हो । यसअघि, पहिलो खेलमा एनआरटी इन्डोनेसियाको कारो युनाइटेडसँग ५–१ ले हारेको थियो ।

मलेसियाको पेनाङ सिटी रंगशालामा शनिबार सम्पन्न खेलमा पेनाङका लुकास सिल्भाले ४३औँ, ६८औँ, ८०औँ र इन्ज्युरी समयमा गोल गरेका थिए । पेनाङका लागि अर्को गोल साराभनले पहिलो हाफको इन्ज्युरी समयमा गरेका थिए ।

नेपाललाई हराएसँगै पेनाङ टीवाईटी कप च्याम्पियन बनेको छ । एनआरटीले ‘ए’ डिभिजन लिगको तयारीस्वरूप यो प्रतियोगितामा प्रतिस्पर्धा गरेको हो । अब एनआरटीले थाइल्यान्डको भ्रमण गर्ने र तीन मैत्रीपूर्ण खेल खेल्ने क्लबले जनाएको छ ।