काठमाडौं । जीवन विकास समाजले दिगो विकास क्षेत्रमा टेवा पुर्‍याउने संघ संस्था, सामुदायिक शैक्षिक संस्था र पत्रकार गरी तीन विद्यामा पुरस्कार वितरण गरेको छ ।

समाजले पहिलोपटक दिगो विकासका लागि जीवन विकास पुरस्कार २०७७ अन्तर्गतका पत्रकारितातर्फको पुरस्कार नागरिक दैनिककी पत्रकार रुबी रौनियारलाई प्रदान गरेको छ । समाजले शुक्रबार शितल निवासमा आयोजना गरेको पुरस्कार वितरण समारोहमा राष्ट्रपति विद्यादेबी भण्डारीले पत्रकार रौनियारलाई ५० हजार नगद र  प्रमाणपत्रबाट सम्मान गरेकी हुन् ।

यही विद्यामा अर्का पत्रकार सुदर्शन सिग्देल पनि ५० हजार नगद र प्रमाणपत्रबाट सम्मानित भए । पत्रकार सिग्देल आजको शिक्षा साप्ताहिकका सम्पादक हुन् ।

यही विद्यामा शिक्षक मासिक ललितपुरले एक लाख नगद र प्रमाणपत्रसहित पुरस्कार प्राप्त गरेको छ । 

समाजले वितरण गरेको पुरस्कारमा पहिलो विद्या गैर सरकारी संघसंथातर्फ ५ लाख नगद र प्रमाणपत्रबाट ललितपुरमा रहेको  रिड संस्थाले प्राप्त गरेको छ भने एक/एक लाख नगद र प्रमाणपत्रबाट प्रोत्साहन पुरस्कार बिराटनगर, मोराङको नारी विकसा संघ र बाल संरक्षण संस्था लालबन्दी सर्लाहीले प्राप्त गरेको छ । 

दोस्रो विद्या सामुदायिक विद्यालय वा शैक्षिक संस्थातर्फ ३ लाख र प्रमाणपत्रबाट चन्द्रगिरि नगरपालिकामा रहेको कंकाली माध्यमिक विद्यालयले प्राप्त गरेको छ । यस विद्यामा प्रोत्साहन स्वरूप एक/ एक लाख नगद र प्रमाणपत्रबाट सिन्धुली, फुस्रेटारमा रहेको जनज्योति मावि  र झापा मेचीनगरमा रहेको आदर्श माविले प्राप्त गरेको छ ।

जीवन विकास समाजले सन् २०१७ मा विश्वभर प्रतिस्पर्धात्मक छनौट भई एजिफन्ड इन्टरनेसनल प्राइजबाट तीन लाख अमेरिकी डलर प्राप्त गरेको थियो । सोही रकममा थप गरी कुल ६ करोड बराबरको जीवन विकास समाज, दिगो विकास कोष २०७६ स्थापना गरेको थियो ।