काठमाडौं । काठमाडौं महानगरपालिका वडा नम्बर ३२ महादेवस्थानकी ५३ वर्षीया मनमाया कार्की बुधबार (आज) बिहान ९ बजे महानगरको कार्यालयमा पुगिन् । मेयर बालेन्द्र शाह (बालेन)लाई भेट्न नाम टिपाइन् । उनी टोलको खानेपानी, विद्युत र सडकको समस्या लिएर गएकी थिइन् । मध्याह्न साढे १२ बजेसम्म बाहिरै कुरिन् । 

तर, बालेन मनमायालाई नभेटेरै कार्यकक्षबाट निस्किए । उनी महानगरका कर्मचारीसँग आक्रोशित भइन । त्यसपछि उनी काठमाडौं मेयरको सचिवालयतर्फ लागिन् ।

बालेनका स्वकीय सचिव भुपदेव शाहलाई भेटेर भनिन्, “हामीले जिताएको मेयर हो नि ! कति टाढा कोटेश्वरबाट आयौँ । आफैँले जिताएको मेयरलाई भेट्न नपाउने ?”

यति भनिसकेपछि स्वकीय सचिव शाहले मनमायालाई 'भेट्नलाई समय लिनुभएको थियो ?' भनेर सोधे । आक्रोशित मनमायाले 'कति पटक समय लिने ?' भनेर जवाफ फर्काइन् ।

मनमाया वडा नम्बर ३२ स्थित १०० घरधुरी खानेपानीकी अध्यक्षसमेत हुन् । 

उनले अगाडि भनिन्, “हाम्रो टोलमा पानी आउँदैन बत्ती छैन । हामी अस्ट्रेलियाका नागरिक त होइनौँ, यही देशका नागरिक हौँ । हामीले जिताएको मेयरलाई भेट्न नपाउने ? हामीले भोट नहाल्ने भन्दा छोरीले आत्माहत्या गरेर मर्छु भनी । ल हेर्नुस् हामीले खानेपानी र बिजुली बत्ती नपाएको कत्ति भयो । वडामा गरेको गुनासो कसैले पनि सुनेन । बत्तीको समस्या पनि उस्तै छ । कतिपटक समय लिने हामीले ?” 

मनमायाले मेयरलाई भेट्न नपाएको विषयमा स्वकिय सचिव शाह कार्यपालिकाका नयाँ सदस्यहरूको सपथ कार्यक्रम भएकाले मेयर त्यतातिर व्यस्त भएको बताए । “कार्यपालिकामा नयाँ प्रतिनिधिहरू आउनुभएको छ । उहाँहरूको कार्यक्रममा जानुभयो । त्यसपछि ३ बजेतिर २/३ वटा कार्यक्रम जुधेको छ,” स्वकीय सचिव शाहले भने । 

शाहले सचिवालयबाट फेरि समय लिन र त्यसपछि आफ्नो समस्याको सबै डकुमेन्ट लिएर आउन आग्रह गरे । जवाफमा मनमायाले भनिन, “भोट दिएर जिताएको त हामीले बालेन छोरालाई नै हो । मेयरलाई भेट्न पाइँदैन भनेको भए त हामीले बालेनलाई भोटै हाल्दैनथ्यौँ नि !” 

मनमायाका फाइल पल्टाउँदै स्वकिय सचिव शाहले भेट्न नपाउने भन्ने नहुने तर व्यस्तताले समय नमिलेनको बताए । “उहाँ तपाईंहरूलाई भेट्न भनेरै निर्वाचित हुनुभएको हो । नम्बर लिएर जानुस् समन्वय गरेर भेट्ने हो । उहाँहरूले तपाईंहरूलाई भेट्नकै लागि कहीँकतै सगुन खान पनि जानुभएको छैन । दिनमा सयवटा बधाई कार्यक्रमका लागि बोलाइरहेका छन् । तर, उहाँले ती सबै कार्यक्रममा जान अस्वीकार गरिरहनुभएको छ,” उनले भने । 

सुरुमा टोलका खानेपानी, सडक, चोरीलगायतका समस्या लिएर मनमाया वडा कार्यालयमा गएकी थिइन् । तर, कसैले पनि उनको गुनासो सुनेन । त्यसपछि उनले कल सेन्टरमार्फत महानगरमा गुनासो गरिन् । तर पनि सम्बोधन हुने छाँटकाँट देखिएन । त्यसपछि आफैँ मेयरलाई नै भेट्छु भनेर उनी महानगर कार्यालयमा पुगेकी थिइन् ।

“मेरो घरमा ल्यापटप चोरी गरेर पल्लो घरमा मोटरसाइकल चोरी गर्ने मान्छेहरू छन् । वडामा गएर कागजपत्र दिइसक्यौँ । वडामा सुनुवाइ नै भएन । कल सेन्टरमा पनि गुनासो गरेकी थिएँ । अब बालेन शाहलाई भेट्न आएका थियौँ,” उनले भनिन् । 

बालेनलाई अरूले भेट्न पाएको तर आफूले मात्रै नपाएको गुनासो उनले गरिन् । 

काठमाडौं महानगरपालिका वडा नम्बर ३२ को कार्यालयले मनमायाले पेस गरेको निवेदनका आधारमा कोटेश्वर सहयोगीनगरमा नयाँ विद्युतको पोल राख्न नेपाल विद्युत प्राधिकरणलाई ०७८ पुस ८ गते पत्रमार्फत आग्रह गरेको थियो । तर, नेपाल विद्युत प्राधिकरणका प्रवक्ता सुरेशबहादुर भट्टराई भने पोल राख्ने विषयमा आफूलाई थाहा नभएको बताउँछन् । 

खानेपानीका सम्बन्धमा काठमाडौं उपत्यका खानेपानी लिमिटेड (केयूकेएल)ले गत वर्ष कात्तिक १ गते मनमायाको निवदेनका आधारमा वडा नम्बर ३२ को कार्यालयलाई सडक अन्न स्वीकृति दिन आग्रह गरेर पत्र लेखेको थियो ।

तर, कुनै पहल नभएपछि स्थानीयले कात्तिक १० गते आफूहरूको धारामा पानी नआएको गुनासो गरेका थिए । उनीहरूले उपत्यका खानेपानी लिमिटेडलाई पत्र लेखेर धारामा पानी आउनले व्यवस्था मिलाइदिन आग्रह गरेका थिए ।

तर, समस्या समाधान भने नभएको मनमायाको गुनासो छ । अर्कोतिर लामो समयदेखि समस्यामा रहँदा वनि विद्युत र खानेपानी महसुल तिर्दै आएको उनको भनाइ छ । 

महानगरवासीका गुनासा तथा समस्या सुनेर समाधान गर्न भनेर महानगरपालिकाले गत सोमबारदेखि कल सेन्टर (गुनासो व्यवस्थापन तथा सोधपुछ केन्द्र) सञ्चालनमा ल्याएको थियो । 

बालेनले महानगरलाई उत्तरदायी स्थानीय सरकारका रूपमा स्थापित गर्न नागरिकका गुनासा सुन्ने प्रणाली विकास गरिएको बताएका थिए । 'महानगर के गर्दै छ ?' भनेर जनताले सोध्न पाउनुपर्ने उनको भनाइ थियो । कल सेन्टरका लागि निःशुल्क टेलिफोन नं. १६६००१–०५५११ मा सम्पर्क गर्न सकिने महानगले जनाएको छ ।