काठमाडौं । ‘एनसेल बाह्रखरी गल्फ’को आठौँ संस्करण काठमाडौंमा सुरु भएको छ । शनिबार बिहान काठमाडौंस्थित गोकर्ण फरेस्ट रिसोर्टमा सञ्चार तथा सुचना प्रविधिमन्त्री पृथ्वीसुब्बा गुरुङले टी–अफ गर्दै प्रतियोगिताको उद्घाटन गरेका हुन् ।

उद्घाटन समारोहमा मन्त्री गुरुङले एनसेल बाह्रखरी गल्फले सुस्ताएको पोखराको पर्यटनलाई जगाएको स्मरण गरे । उनले आफू गण्डकी प्रदेशको मुख्यमन्त्री हुँदा नै बाह्रखरी मिडियासँग भावनात्मक सम्बन्ध जोडिएको स्मरण गरे ।

“बाह्रखरीसँग मेरो भावानात्मक सम्बन्ध २०७७ मा नै हो । त्यतिबेला कोभिडको महामारीमा थियौँ । गल्फ मुस्ताङमा आयोजना  गर्ने भन्नुभयो । तर, त्यहाँ सम्भव भएन,” उनले भने ।

त्यसपछि पोखरामा गल्फ हुँदा सुरक्षित रहेको सन्देश फैलिएको गुरुङले बताए । “पोखरा सुस्ताइरहेको थियो । सबैकुरा बन्द थियो । बाह्रखरीको आयोजनामा पोखरामा गल्फ हुँदा धेरैको उपस्थिति भयो,” उनले सम्झिए, “त्यसले गर्दा पोखरा सुरक्षित रहेछ भन्ने सन्देश संसारभर प्रचार भयो । सुतिसकेको पोखरालाई पर्यटन क्षेत्रमा जगाउने काम प्रयत्नले भएको थियो ।”

उद्घाटन समारोहमा बाह्रखरी मिडियाका प्रधानसम्पादक प्रतीक प्रधानले प्रतियोगितालाई भव्यरूपमा सम्पन्न गर्न सहयोग गरेका प्रायोजकसहित सहयोगी संस्थाहरूलाई धन्यवाद ज्ञापन गरे । उनले आगामी दिनमा पनि लामोसम्म सहयोग प्राप्त हुने विश्वास व्यक्त गरे ।

उनले निमन्त्रणा स्वीकार गरेर उद्घाटन समारोहमा पुगेका सञ्चारमन्त्री गुरुङप्रति पनि आभार व्यक्त गरे । गुरुङले बाह्रखरीको प्रयासलाई प्रोत्साहन गरेको उनको भनाइ छ ।

शनिबार बिहान सञ्चारमन्त्री गुरुङले टी–अफ गर्दै प्रतियोगिताको उद्घाटन गरेका हुन् । प्रतियोगितामा आज ९६ कर्पोरेट खेलाडीहरूले प्रतिस्पर्धा गर्दै छन् । 

प्रतियोगिता १८ होलमा स्टेबल फोर्ड फर्म्याटमा हुनेछ । यसको अर्थ कुनै पनि होलमा तोकिएको भन्दा बढी स्ट्रोक हान्न पाइने छैन । यस नियमले ठूलो प्रतियोगितामा समयको बचत गर्नेछ ।

प्रतियोगितामा भारत, अमेरिका, चीन, सिंगापुर, श्रीलंकाका गल्फरले पनि प्रतियोगितामा सहभागिता जनाउनेछन् । नेपालस्थित विदेशी नियोगका प्रतिनिधि पनि गल्फ प्रतियोगितामा सहभागी हुनेछन् ।

यसैगरी, प्रतियोगितामा काठमाडौंसहित पोखरा, धरान, चितवन, बुटवल, नेपालगन्जलगायत क्षेत्रका कर्पोरेट गल्फर, न्यायाधीश र केही सरकारी उच्च अधिकारीले पनि प्रतियोगितामा सहभागिता जनाउँदै छन् ।

कर्पोरेट क्षेत्रका खेलाडीबीच हुने प्रतियोगिता देशकै प्रतिष्ठित प्रतियोगिता भएको यसका ‘अल–राउन्ड’ विजेताले २४ क्यारेट सुनले बनेको गल्फ बल तथा अन्य पुरस्कार प्राप्त गर्नेछन् । साथै, अन्य विभिन्न विधामा विजेताले ट्रफी तथा प्रमाणपत्र प्राप्त गर्नेछन् ।

कुनै प्रतियोगीले तोकिएको होलमा एकै सटमा लक्ष्य प्राप्त गरे भने ‘होल इन–वन’ पुरस्कारका रूपमा बीवाईडीको ‘एट्टो थ्री’ गाडी प्राप्त गर्नेछन् ।

बाह्रखरी मिडियाले कर्पोरेट गल्फ प्रतियोगितासँगै नेपालको आर्थिक समृद्धिमा टेवा पुर्‍याउने उद्देश्यले वार्षिकरूपमा आयोजना गर्दै आएको ‘आर्थिक परिसंवाद’ पनि आजै गोकर्ण फरेस्ट रिसोर्टको ‘कोर्ट यार्ड’मा सम्पन्न हुँदै छ ।