काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईं शुक्रबार निर्वाधरूपमा कार्यालय पुगेका छन् । उनी आज कार्यालय समयमै कुनै अवरोधबिना कार्यालय प्रवेश गरेका हुन् ।

“आज प्रमुख प्रशासकीय अधिकृत निर्वाधरूपमा कार्यालय पुग्नुभएको छ, कुनै अवरोध भएन,” महानगरका प्रवक्ता नवीन मानन्धरले भने ।

उनका अनुसार, प्रमुख प्रशासकीय अधिकृत आएसँगै कर्मचारीको खातामा तलब पठाउने प्रक्रिया अघि बढिसकेको छ । सोमबारसम्म सबै कर्मचारीको खातामा तलब पठाउने तयारी भएको उनको भनाइ छ ।

“सबैभन्दा पहिला कर्मचारीको तलब हाल्नुपर्‍यो । सोमबारसम्म सबै कर्मचारीको तलब खातामा पठाउने गरी प्रक्रिया थालेका छौँ,” उनले भने ।

कर्मचारीको खातामा तलब पठाउन तीन महिनादेखि थन्किएका फाइल खोल्न थालिएको प्रवक्ता मानन्धर बताउँछन् ।

महानगरमा शिक्षकसहित तीनहजार ६०० बढी कर्मचारी छन् । उनीहरूमध्ये शिक्षकले पाँच महिनादेखि तलब पाएका छैनन् । जनप्रतिनिधि र कर्मचारीले तीन महिनादेखि तलब पाएका छैनन् ।

नगरप्रहरी प्रमुख पाण्डेलाई के होला ?
काठमाडौं टावरको प्रक्रिया नपुर्‍याएर नक्सा पास गरेको आरोपमा प्रमुख प्रशासकीय अधिकृत गुरागाईं मेयर बालेन शाहको निलम्बनमा परेका थिए । निलम्बनमा परेको तीन महिना १४ दिनपछि बिहीबार (चैत २१ गते) महानगरमा हाजिर गर्न पुगेका थिए ।

तर, उनलाई राजुनाथ पाण्डे नेतृत्वको नगरप्रहरीले कार्यालय प्रवेशमा रोक लगाउने प्रयास गरेको थियो । नगरप्रहरीको बल प्रयोगका बाबजुद गुरागाईं महानगरका कर्मचारी र जनतप्रतिनिधिको सहयोगमा कार्यालय प्रवेश गरेका गरेका थिए ।

प्रमुख प्रशासकीय अधिकृतलाई रोकेपछि उपमेयर सुनिता डंगोलले नगरप्रहरी प्रमुख ‍पाण्डेलाई कसको आदेशमा बल प्रयोग गरेको भनेर प्रश्न गरेकी थिइन् । पाण्डेले आफूले मेयर शाहको मौखिक आदेशमा कदम चालेको प्रतिक्रिया दिएका थिए ।

अब नगरप्रहरी प्रमुख ‍पाण्डेको भूमिकामाथि आगामी कार्यपालिका बैठकमा छलफल गरिने एक कार्यपालिका सदस्यले जानकारी दिए ।

“नगरप्रहरी प्रमुखले मेयरको निर्देशनमा प्रमुख प्रशासकीय अधिकृतलाई कार्यालय प्रवेशमा रोक लगाउन मिल्दैन, उपमेयरसँग पनि त्यसरी बोल्न मिल्दैन । उहाँलाई निलम्बन गर्ने वा के गर्ने भनेर आगामी कार्यपालिका बैठकमा छलफल गर्छौ,” ती सदस्यले बाह्रखरीसित भने ।

काठमाडौं महानगरपालिकाको महानगर प्रहरी सेवालाई व्यवस्थापन गर्न बनेको महानगर प्रहरी ऐन, २०८० मा महानगर प्रहरी गठन, रेखदेख तथा नियन्त्रणसम्बन्धी व्यवस्था छ ।

“महानगर प्रहरीको परिचालन रेखदेख, नियन्त्रण, र निर्देशन दिने अधिकार प्रमुख प्रशासकीय अधिकृतलाई हुनेछ र निजको आदेश र निर्देशन पालना गर्नु प्रत्येक महानगर प्रहरीको कर्तव्य हुनेछ,” ऐनमा भनिएको छ ।