काठमाडौं । गृहमन्त्री बालकृष्ण खाँणले नवलपरासी जिल्ला अदालतमा गोली चलेको घटनालाई गम्भीर घटनाका रूपमा सरकारको ध्यानाकर्षण भएको बताएका छन् । 

“नवलपरासी जिल्ला अदालतमा ३ः३० बजे गोली चल्यो । रामग्राम–३ परासीबजारका अन्दाजी वर्ष ३०का हंशराज यादवले काकी नाता पर्ने रोशनी यादवसँग जग्गाको झगडामा जिल्ला अदालत पुग्नुभयो, त्यही जिल्ला अदालतको प्रांगणमा गोली चलाउनुभयो,” खाँणले भने, “गोलीबाट कुनै पनि क्षति भएको छैन । तथापि यो ज्यादै सेन्सिटिभ र गम्भीर अपराध हो ।” 

उनले हंशराज यादव त्यहाँबाट फरार रहेको भन्दै प्रहरीले उनलाई तत्काल पक्राउ गर्ने विश्वास व्यक्त गरे ।