काठमाडौं । अमेरिकी बाबु र भारतीय आमाबीच छोरीका लागि अध्यागमन विभागमै छिनाझपटी भएको छ ।

बुधबार ३८ वर्षीय अमेरिकी नागरिक करण गोएल आठ वर्षीया छोरी मेहरको पासपोर्ट बनाउन काठमाडौंस्थित अध्यागमन विभाग पुगेका थिए । भिसाका लागि प्रक्रिया सुरु गर्नै लाग्दा भारतीय नागरिक कनिका गोएल पनि अध्यागमन विभागमा आइपुगिन् । विभाग परिसरमा करण र कनिकाबीच छोरीका लागि छिनाझपटी भयो । सोही कारण विभाग केही घण्टा तनावमय बन्यो ।

बुवा करणले विभाग परिसरको ढोकामा छोरी बोकेर कुनातिर लुकाइरहँदा छोरी मेहर भारतीय भाषामा ‘मलाई बचाउनुस् प्लिज’ भन्दै थिइन् भने करण ‘हामीलाई मद्दत गर्नुस्’ भन्दै थिए । त्यसपछि करण र कनिकाबीच छोरी मेहरलाई लिएर खिचातानी सुरु भयो । छोरी चिच्याउँदै रुन थालिन् ।

उनीहरूबीच छिनाझपटी भएको भिडियोमा कोही करणलाई ‘ऊ आमा हो, तिमी उसलाई यस्तो गर्न सक्दैनौँ’ भनिरहेको आवाज सुनिन्छ । करण भाग्लान् भनेर परिसरको ढोका लगाउन कनिका पक्ष चिच्याइरहेको देखिन्छ । उनीहरूबीच झगडा हुुँदा भारतीय दूतावास र अमेरिकी दूतावास दुवैका प्रतिनिधिहरू त्यहाँ उपस्थित थिए ।

उनीहरूको झगडाका कारण त्यहाँ आएका सेवाग्राहीलाई मर्का पर्न थालेपछि विभागले दुवै पक्षलाई छुट्टै कोठामा राखेर छलफलमा गरेको अधिकृत मनोहर थापाले जानकारी दिए । उनले भने, “बाबुचाहिँ छोरीको भिसा लिन विभाग आएका थिए, तर आमा आएर झगडा सुुरु भयो । झगडा समाधान भएपछि छोरी बुवाले नै लिएर गएका छन् ।”

के भएको थियो ?
३८ वर्षीया कनिका र करणबीच सम्बन्धविच्छेद भइसकेको छ । सन् २०१६ देखि नै छोरी मेहर कनिकासँग बस्दै आएकी थिइन् । उनीहरूबीच छोरीको ‘कस्टडी केस’का लागि भारतीय अदालतमा मुद्दा चलेको थियो । मुुद्दा कनिकाले जितेकी थिइन् ।

करण र उनका आमा जसलिन गोएल गएको साता अमेरिकाबाट भारत आए । भारतको उच्च अदालतबाट छोरीलाई भेट्न पाउने अधिकार लिए । कनिकाका अनुसार उनले अप्रिल १५ मा होटेलबाट छोरीलाई ट्याक्सीमा राखेर लगे । अदालतको आदेशानुसार उनले अप्रिल १७ को राति ८ बजेसम्म छोरी कनिकालाई बुझाइसक्नुपर्ने थियो ।

नियमानुसार करण र जसलिनले उच्च अदालतमा उनीहरूको अमेरिकी पासपोर्ट बुझाए । तर, उनीहरू छोरीको सहित अमेरिकी पासपोर्ट बोकी बनवासा नाका हुँदै नेपाल प्रवेश गरे । कनिकाका अनुसार उनीहरूले छोरी मेहरलाई अपहरण शैलीमा नेपाल ल्याए । उनीहरू छोरीलाई लिएर नेपालबाट अमेरिका भाग्न खोजेको कनिकाको आरोप छ । उनीहरूले भारत प्रवेश गर्दा प्रयोग गरेको पासपोर्ट नभई अदालतमा अर्कै पासपोर्ट बुझाएको समेत कनिकाको आरोप छ ।

यता, भिसाको प्रक्रिया भर्खर सुरु गर्न लागेकाले करणले छोरीका लागि भिसा पाउने÷नपाउनेबारे अहिल्यै केही भन्न नसकिने विभागले जनाएको छ । यस्तै, कनिकाले करणले बोकेको पासपोर्टमा पनि सवाल उठाएकी छन् । यसबारेमा थापा भन्छन्, “प्रक्रिया भर्खर सुरु गर्न लागेकाले यसबारेमा केही भन्न सक्दैनौँ । भिसा दिन मिल्ने भए दिने हाम्रो काम हो ।”

महानगरीय प्रहरी परिसर काठमाडौंका प्रवक्ता एसपी दिनेशराज मैनालीले भने प्रहरीलाई घटनाबारे कुनै जानकारी नभएको बताए ।

भिडियो हेर्नोस्–