काठमाडौं । फुलहमले मंगलबार राति प्रेस्टन नर्थ इन्डलाई ३–० ले हराउँदै इंग्लिस प्रिमियर लिगमा बढुवा भएको छ । जितसँगै लन्डन क्लब फुलहम च्याम्पियनसिपको दोस्रो स्थानमा हुने पक्का भएको हो ।

दोस्रो श्रेणीको लिग च्याम्पियनसिपको शीर्ष स्थानमा रहेको फुलहमले ४२ खेलबाट ८६ अंक जोडेको छ । फुलहत गत वर्ष प्रिमियर लिगबाट रेलिगेसनमा परेको थियो ।

च्याम्पियनसिपको शीर्ष दुई क्लब प्रिमियर लिगमा बढुवा हुन्छन् । तेस्रो स्थानदेखि छैटौँ स्थानसम्मका क्लबले प्लेअफ खेल्नेछन् । 

गए राति फुलहमले एलेक्जेन्डर मित्रोभिकको गोलबाट नवौँ मिनेटमा अग्रता लिएको थियो । ३४औँ मिनेटमा फाबियो कार्भाल्होले अग्रता दोब्बर बनाए । मित्रोभिकले ४१औँ मिनेटमा तेस्रो गोल थपेका थिए ।