विराटनगर । राजविराज नगरपालिका र वीरगन्ज महानगरपालिकाले विराटनगरमा जारी प्रथम ट्वान्टी–२० मेयर कप क्रिकेट प्रतियोगितामा जित हासिल गरेका छन् ।

विराटनगर महानगरपालिका–१९ स्थित खेल मैदानमा आज भएको पहिलो खेलमा राजविराजले जनकपुरधाम उपमहानगरपालिका र दोसो खेलमा वीरगन्जले विराटनगरलाई पराजित गरेको हो ।

राजविराजले जनकपुरलाई ६ रनले हरायो । जितसँगै राजविराज समूह ‘ए’को विजेता बनेको छ ।

टस जितेर ब्याटिङ गरेको राजविराजले निर्धारित २० ओभरमा ८ विकेट गुमाएर ८१ रन बनाएको थियो । राजविराजका लागि विकास दासले २३ रन बनाउँदा अमित यादवले १४ र अभिषेक कार्कीले १३ रन जोडे ।

जनकपुरका हरिशंकर साहले तीन र साइमन राँयले दुई विकेट लिए ।

८२ रनको झिनो लक्ष्य पछ्याएको जनकपुरले पूरै ओभर खेल्दै ७ विकेट गुमाएर ७५ रन मात्र बनाउन सक्यो । जनकपुरका लागि अकबर अलीले ३९ रन र हिमांशु दत्तले १३ रन बनाए ।

राजविराजका नेपाली राष्ट्रिय टोलीका खेलाडी समेत रहेका विवेक यादवले दुई विकेट लिए । महबुव आलम, अनिल यादव र रोहित सिंहले एक/एक विकेट लिए ।

दोस्रो खेलमा वीरगन्जले विराटनगरलाई ५ विकेटले हरायो । जितसँगै वीरगन्ज समूह ‘बी’को विजेताका रूपमा सेमिफाइनलमा पुगेको छ ।

टस जितेर ब्याटिङ गरेको विराटनगरले २० ओभरमा ८ विकेटको क्षतिमा १४५ रन बनाएको थियो । कप्तान सिद्धान्त लोहनीले २८ बलमा ४५ रन जोडे । दीपक पासवानले २८ रनको योगदान गरे ।

वीरगन्जका लागि इमरान शेखले तीन विकेट लिँदा भुलवान सहनीले दुई विकेट लिए ।

वीरगन्जले १७.४ बलमा ५ विकेट गुमाएर लक्ष्य पूरा गर्‍यो । तीर्थराज दासले ४० बलमा ५२ रन बनाए । सोनु अन्सारीले ३६ रन जोडे ।

विराटनगरका मुकुन्द यादवले चार विकेट लिँदा मेहबुबबाबु इराकीले एक विकेट लिए ।

प्रतियोगितामा प्रदेश नम्बर–१ का आयोजक विराटनगर महानगरपालिका, इनरुवा नगरपालिका र मेची नगरपालिका तथा मदेश प्रदेशका वीरगन्ज महानगरपालिका, जनकपुरधाम उपमहानगरपालिका र राजविराज नगरपालिका सहभागी भएका छन् । विजेताले नगद एक लाख एक हजार र उपविजेताले ५१ हजार रुपैयाँ पुरस्कार पाउनेछन् ।