काठमाडौं । श्रम, रोजगार तथा सामाजिक सुरक्षामन्त्री कृष्णकुमार श्रेष्ठले लगानी मैत्री वातावरण बनाउन सरकार प्रतिवद्ध रहेको बताएका छन् । संयुक्त अरब इमिरेट्स (यूएई) को भ्रमणका क्रममा मन्त्री श्रेष्ठले नेपाली बिजनेस काउन्सिल, दुबईका पदाधिकारीहरुको भेटमा लगानी मैत्री वातावरण बनाउन सरकार प्रतिवद्ध रहेको बताएका हुन् । 

काउन्सिलका अध्यक्ष डा. असिफ अली सिद्दिकी नेतृत्वमा नेपाली व्यवसायीहरुले मन्त्री श्रेष्ठसँग वैदेशिक रोजगारीसँगै विदेशमा नेपाली उत्पादन र सेवाको बजार विस्तार गर्नेतर्फ पनि सरकारले ध्यान दिनुपर्ने बताएका थिए । वैदेशिक रोजगारमा जाने अदक्ष श्रमिकहरूले विभिन्न समस्या झेल्दै आएको भन्दै आवश्यक सीप–दक्षताको विकासमा पनि सरकारले ध्यान दिनुपर्ने बताए । 

मन्त्री श्रेष्ठले वैदेशिक रोजगारीको क्षेत्र व्यवस्थित र सुरक्षित गर्न आफू प्रयत्नशील रहेको बताए । मन्त्री श्रेष्ठले विदेशमा नेपालीले आर्जेको सीप र पूँजी नेपाल भित्र्याउन सहयोग गर्ने प्रतिवद्धता समेत जनाए । 

नीतिगत र व्यवहारिक पक्षमा लगानी मैत्री वातावरण बनाउन सरकार प्रतिवद्ध रहेको उनको भनाइ छ । व्यवसायीहरुले यूएईमा भिजिट भिसाबाट सिर्जित समस्याको समाधान गर्न आग्रह गरे ।  भिजिट भिसा सम्वन्धी समस्या समाधानका लागि यूएई सरकारसँग मिलेर काम गर्ने बताउँदै मन्त्री श्रेष्ठले सकेसम्म यूएई मै रोजगारी, ओभरस्टे भएर धेरै शुल्क बुझाउनुपर्ने भएकाहरुलाई मिनाहा गर्न र नेपाल लैजानैपर्नेहरुलाई उद्धारमा सहयोग गर्ने प्रतिवद्धता यूइई सरकारले जनाएको बताए ।