काठमाडौं । छोटो दुरीका लागि उपयोगी मानिएको अत्याधुनिक प्रविधियुक्त सवारी साधन निर्माणका लागि विश्वप्रसिद्ध कम्पनी सेगवे–नाइनबोटको इलेक्ट्रिक स्कुटर सेगवे ई–१०० नेपालमा सार्वजनिक गरिएको छ ।

सन् २००१ देखि यो कम्पनी दुई पाँग्रे सेल्फ–ब्यालेन्सिङ सवारी र इलेक्ट्रिक सवारीहरूको उत्पादनका लागि प्रख्यात छ ।

सेगवेले सन् १९९९ देखि रोबोटिक प्रविधिमा प्रवेश गरेता पनि विगतका वर्षहरूमा प्राविधिक विकासमा यसको प्रगतिले फड्को मारेको कम्पनीले जनाएको छ । विषेश गरी बम डिस्पोजल रोबोट, पर्सनल रोबोट, डेलिभरी रोबोट उत्कृष्ट रहेको जनाइएको छ । “नाइनबटसँग रणनीतिक सहकार्य पछि सेगवे आफूलाई यस यस विधामाउत्कृष्ट प्रमाणित गर्दै आएको छ,” कम्पनीले भनेको छ ।   

सेगवे नाइनबोटको लागि नेपालमा आइहव प्रालि आधिकारिक आयातकर्ता र वितरक कम्पनी हो । आई हव प्रालिका निर्देशक लोकेश ओलीले नेपालमा प्रख्यात ब्रान्ड सेगवेलाई विद्युतीय सवारी साधनको साथ स्वच्छ र सुरक्षित पर्यायवरण प्रवर्द्धन गर्ने उद्देश्यले आयात गरेको बताए ।  

यी स्कुटर माघको तेस्रो हप्ता देखि नेपाली बजारमा उत्पादक वारेन्टीका साथ उपलब्ध रहने जनाइएको छ । आगामी दिनमा सोही ब्रान्डको अन्य स्कुटर पनि ल्याउने जनाएको छ ।

यस्ता छन् विशेषता

उत्कृष्ट सुरक्षाका सुविधाहरूको साथ आउने सेगवे ई–१०० चालक नबसेसम्म स्टार्ट हुँदैन । त्यसैगरी, स्कुटरको स्ट्यान्ड नउठाउँदासम्म पनि यो चल्दैन ।

सेगवे ई–१०० मा किलेस सिस्टम रहेको छ । सुन्दर ढंगले डिजाइन गरिएको साँचो बाहेक रिमोट कन्ट्रोलमा दुई वटा बटनहरू छन् । एउटाले स्कुटरलाई अन/अफ मोडमा राख्छ भने अर्कोले स्कुटरलाई लक गर्न मद्दत गर्दछ ।

सिट कुसनको तल्लो भागमा रहेको २२ लिटर क्षमताको सिट कास्कले पूर्ण साइजको हेलमेट वा १३ इन्चको ल्यापटप अट्ने ब्याग वा सोही भोल्युमको वस्तुहरू राख्ने पर्याप्त ठाउँ उपलब्ध गराउँछ ।

नाइनबट ई–स्कुटर ई–१०० चार भिन्न आकर्षक रंगहरूमाउपलब्ध रहेको छ । कालो, सेतो, नीलो र रातो रंगमा उपलब्ध हुने कम्पनीले जनाएको छ । विद्युतीय सवारी साधन भएपनि इ–१०० को तौल ८० केजी रहेको जनाइएको छ ।

यसमा छ वटा लेन्स सहितको इन्टेलिजेन्ट म्याट्रिक्स एलईडी हेडल्याम्प राखिएको छ जसले स्वचालित रूपमा वातावरणीय प्रभावअनुसार प्रकाश फ्याल्दछ ।

यो ई–स्कुटरमा मोबाइल चार्जिङ स्लट, तीन फरक ड्राइभिङ मोड, लिथियम–आयनयुक्त पानी प्रतिरोधी ब्याट्रीलगायत विशेषता रहेको जनाइएको छ ।

सेगवे ई–१०० को नेपाली मूल्य २ लाख ९१ हजार रुपैयाँ तोकिएको कम्पनीले जनाएको छ ।