काठमाडौं । नेपाल बास्केटबल संघले टर्नपाइक इभेन्ट प्रालिलाई आयोजना गर्न दिएको राष्ट्रिय बास्केटबल लिगमा आठ क्लबले प्रतिस्पर्धा गर्ने भएका छन् । प्रतियोगिताको मिति भने तोकिएको छैन ।

आयोजक टर्नपाइकले नेपालमा पहिलोपटक बास्केटबलको फ्रेन्चाइज लिग हुन लागेको दाबी गरेको छ । प्रतियोगितामा प्रतिस्पर्धा गर्ने आठ क्लबलाई टर्नपाइक इभेन्टले लाइसेन्स प्रदान गर्ने बताइएको छ ।

टर्नपाइकले लाइसेन्स वितरण गरेबापत आउने रकमको ४० प्रतिशत रकम बास्केटबल संघलाई बुझाउनुपर्नेछ ।

पुरुषको मात्र लिग हुनेछ । आठ क्लबले काठमाडौं, ललितपुर, कीर्तिपुर, पोखरा, भक्तपुर, धरान, विराटनगर, चितवन र बुटवल÷धनगढीका सहरको प्रतिनिधत्व गर्ने बताइएको छ ।

त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा हुने प्रतियोगितामा क्लबहरूले टिममा १० नेपाली र दुई विदेशी गरी १२ खेलाडी राख्न पाउनेछन् । त्यस्तै, मुख्य प्रशिक्षक र सहायक प्रशिक्षकसहित फिजियो र व्यवस्थापक राख्नुपर्नेछ ।

लिगमा प्राविधिक पक्षको जिम्मा नेपाल बास्केटबल संघले लिनेछ । संघले व्यावसायिक खेलाडी र प्रशिक्षक दर्ता गर्नेछ । खेलाडीलाई दुई तहमा वर्गीकरण गरी क्लबमा अनुबन्ध गराउनेछ ।