काठमाडौं । सुरुमा लिएको अग्रता जोगाउन नसक्दा नापोलीले इटालियन सिरी ‘ए’मा बिहीबार राति युभेन्टससँग अंक बढेको छ । 

भ्रमणकारी नापोलीले एलिनाज रंगशालामा २३औं मिनेटमा अग्रता लिएको थियो । माटेयो पोलिटानोको पासमा द्रिइस मार्टेन्सले गरेको गोलबाट नापोलीले अग्रता लिएको हो । ५४औं मिनेटमा फेडेरिको चिइसाले बराबरी गोल फर्काएका थिए । 

बराबरीपछि नापोलीले दोस्रो स्थानको एसी मिलानसँग अंकदूरी घटाउने मौका गुमाएको छ । नापोलीले २० खेलबाट ४० अंक जोडेको छ । जुन दोस्रो स्थानको मिलानभन्दा पाँच अंकले पछाडि हो भने शीर्ष स्थानको इन्टर मिलानभन्दा ६ अंकले पछाडि हो । इन्टरले एक खेल कम खेलेको छ । कोभिड–१९ का कारण इन्टर र बोलोग्नाको खेल स्थगित भएको थियो ।

युभेन्टस भने ३५ अंकका साथ पाँचौं स्थानमा छ । जुन चौथो स्थानको एटलान्टाभन्दा तीन अंकले पछाडि हो । एटलान्टाले अझै एक खेल कम खेलेको छ । 

मिलानको सहज जित

मिलानले गएराति नै सम्पन्न खेलमा एएस रोमालाई ३–१ ले हराएको थियो । मिलानले घरेलु मैदानमा आठौं मिनेटमै ओलिभर जिरौडको गोलबाट अग्रता लिएको थियो । जिरौडले पेनाल्टीमा गोल गरेका हुन् । 

१७औं मिनेटमा जुनियर मेसियासले मिलानको अग्रता दोब्बर बनाए । जोजे माउरिन्होको रोमाले ४०औं मिनेटमा टमी अब्राहमको गोलबाट पुनरागमनको प्रयास गरेको थियो । तर, ८२औं मिनेटमा मिलानका राफायल लियोले अर्को गोल थपेपछि रोमाको प्रयास असफल भएको थियो । 

इन्जुरी समयमा ज्लाटज इब्राहिमोभिचले पेनाल्टी अवसर खेर फाले । त्यसअघि जियानलुका मान्सिनीले दोस्रो पहेंलो कार्डको सामना गरेपछि रोमा दश खेलाडीमा सीमित बनेको थियो । 

पराजित रोमा ३२ अंकका साथ सातौं स्थानमा छ । 

गएराति नै सम्पन्न खेलमा लाजियोले इम्पोलीसँग ३–३ को बराबरी खेल्यो । बराबरीपछि ३२ अंक जोडेको लाजियो आठौं स्थानमा छ भने २८ अंक जोडेको इम्पोली नवौं स्थानमा छ । त्यस्तै जिनोवा र सासउलोले पनि १–१ को बराबरी खेल्यो । २० खेलबाट २५ अंक जोडेको सासउलो १३औं स्थानमा छ भने जिनोवा १२ अंकका साथ रेलिगेशन क्षेत्रमा छ ।