काठमाडौं । कथित उपल्लो जातकी युवतीसँग विवाह गरेको र एक सातादेखि बेपत्ता रहेको भनिएका हुम्लाको सर्केगाड गाउँपालिका–१, जैर नात्ताका चन्द्रे कामी आज सकुशल फेला परेका छन् ।

चन्द्रेको खोजी गरिरहेको प्रहरी टोलीले खार्पुनाथ गाउँपालिका–५, याङ्चु बजारमा हिँडिरहेको अवस्थामा फेला पारेको हो । घटना तल्लो हुम्लामा घटेको हो भने चन्द्रे माथिल्लो हुम्लामा भेटिएका हुन् ।

चन्द्रेले कथित माथिल्लो जातकी युवतीसँग बिहे गरेकाले युवती पक्षले बेपत्ता पारेको उनको परिवारले दाबी गर्दै आएको थियो । प्रहरीले युवती पक्षसँग लिएको बयानमा चन्द्रेलाई उसैको गाउँ आसपास छोडेको खुलेको थियो ।

जिल्ला प्रहरी कार्यालय हुम्लाका प्रहरी निरीक्षक दानसिंङ भण्डारीले चन्द्रेको शरीरमा कुनै चोटपटक नदेखिएको र सकुशल भेटिएको बताए । ‘‘युवती पक्षले घटना घटेकै दिन केटाको गाउँतिर छोडेको बयान दिएको थियो । अहिले केटाको अवस्था हेर्दा सामान्य देखिन्छ,” प्रहरी निरीक्षक भण्डारीले भने ।

गएको मंसिर २९ गते राति १२ बजेतिर करिब २० जना युवती पक्षको समूहले चन्द्रेलाई नग्न बनाएर निर्घात कुटपिट गर्दै लगेको परिवारले दाबी गर्दै आएको थियो ।

प्रहरी निरीक्षक भण्डारी भन्छन्, ‘‘चन्द्रेलाई युवती पक्षले छोडिसकेपछि आफ्न्तकोमा बसेको प्रहरीको प्रारम्भिक अनुसन्धानमा खुलेको छ । चन्द्रेको अवस्था हेर्दा पनि त्यही देखिन्छ ।”

मंसिर ५ गते सर्केगाड गाउँपालिका–१, जैर नात्ता गाउँका १९ वर्षीय चन्द्रे र मुगुको सोरु गाउँपालिका–४, लिपु्र गाउँकी १९ वर्षीया सुन्तली मल्ल भागेर हुम्लाको रिप गाउँमा पुगेका थिए । उनीहरू सर्केगाड गाउँपालिका–२, रिप गाउँमा लुकीछिपी बसेका थिए । त्यस दिनदेखि युवती पक्षले खोजिरहे पनि भेट्टाएको थिएन । पछि युवती पक्षले केही नगर्ने भन्दै चन्द्रेलाई घर आउन मनाइएको थियो ।

लुकीछिपी बसेको समयमा चन्द्रेले वडा नम्बर–१, जैरका वडाध्यक्ष गोकुल बुढालाई विवाह दर्ताका लागि आग्रह गरेका थिए । तर, वडाध्यक्ष बुढाले उमेर नपुगेकाले विवाह दर्ता गर्न नमिल्ने बताएका थिए ।

कुटपिट घटनापछि चन्द्रेलाई बेपत्ता पारेको आरोप लगाइएको २० जनाको समूह फरार थियो । उक्त समूहमा रहेका युवतीका बुवालाई प्रहरीले गएको सोमबार पक्राउ गरेको थियो ।

प्रहरी निरीक्षक भण्डारीले भने, ‘‘केटालाई जिल्ला प्रहरी कार्यालयमा ल्याइँदै छ । त्यसपछि सोधपुछ गरिन्छ । युवती र उनका बुवालाई पनि घटनास्थलमा खटिएको डीएसपीको टोलीले जिल्ला सिमकोटमै ल्याइँदै छ । दुवै पक्ष आइसकेपछि अरू थप सोधपुछ कार्य अगाडि बढाइनेछ ।”

चन्द्रेको परिवारले कुटपिट घटनाको भोलिपल्ट पुस १ गते प्रहरीलाई खबर गरेको थियो । सोही दिन परिवारले स्थानीय डाँडामा चन्द्रेको टिसर्ट फेला पारेको थियो ।

घटनास्थलमा श्रीनगर प्रहरी हुम्ला, सोरुकोट प्रहरी मुगु, सर्केगाड प्रहरी हुम्लाको टोलीले चन्द्रेको खोजी गरिरहेको थियो । पाँच दिनसम्म चन्द्रेको पत्ता नलागेपछि जिल्लाबाट डीएसपीको टोली परिचालन गरिएको थियो । घटनास्थलमा करिब ४० जनाको प्रहरी टोली सक्रिय थियो ।

मुगुको सोरु गाउँपालिकाको एक होटेलमा काम गर्दा चन्द्रेको युवतीसँग भेट भएको बताइएको छ । सोही समयदेखि उनीहरूको प्रेम सम्बन्ध अघि बढेको चन्द्रेको परिवारको भनाइ छ ।