काठमाडौं । युवा तथा खेलकुदमन्त्री महेश्वरजंग गहतराजले नवनियुक्त सदस्यसचिव टंकलाल घिसिङलाई खेलकुदमा राजनीति नगरी पूर्ण रूपमा खेलकुदको विकासमा ध्यानकेन्द्रित गर्न निर्देशन दिएका छन् ।
“खेलाडीको मनोबललाई उच्च बनाउने काममा सरकार प्रतिबद्ध छ । त्यसका लागि राखेपले पनि आवश्यक कार्ययोजना बनाउनुपर्छ । राखेपको मुख्य काम नै खेल र खेलाडीको व्यस्थापन हो,” मंगलबार घिसिङलाई राष्ट्रिय खेलकुद परिषद् (राखेप) सदस्यसचिवको शपथ गराएपछि मन्त्री गहतराजले भने, “संस्थाभित्र बसेर राजनीति नगर्नुहोस् । राजनीति गर्ने काम राजनीतिज्ञको हो । त्यो हामी छौँ ।”
मन्त्री गहतराजले नेपालमा धेरै खेल संघहरू बिनाकार्ययोजना चलेका हुनाले त्यसको निगरानी गरी चुस्त बनाउन पनि निर्देशन दिए । “नेपालमा २७० भन्दा धेरै संघहरू छन् । सबै संघहरूले राम्रोसँग काम गरेका छैनन् । उनीहरूको अफिस पनि झोलामै राखेर हिँडेका छन् । तिनीहरूलाई खोजेर सक्रिय बनाउनुपर्यो,” उनले भने ।
गएको सोमबारको मन्त्रिपरिषद्को बैठकले घिसिङलाई सदस्यसचिवमा नियुक्त गरेको थियो ।
गएको कात्तिक १ गते तत्कालीन सदस्यसचिव रमेशकुमार सिलवाललाई पदमुक्त गर्ने निर्णय गरिएको थियो । त्यसपछि रिक्त रहेको पदका लागि मन्त्री गहतराजले मन्त्रिपरिषद्को बैठकमा तीनजनाको नाम पेस गरेका थिए । त्यसमध्ये मन्त्रिपरिषद्ले घिसिङलाई नियुक्त गरेको हो ।
घिसिङ नेपाल रग्बी संघको अध्यक्ष तथा नेकपा (माओवादी केन्द्र) वाग्मती प्रदेशको सचिवालय सदस्य हुन् । मन्त्री गहतराजले निर्देशन दिइरहँदा सदस्यसचिवकै रग्बी संघको हालत पनि ‘झोले’ संघको भन्दा कम छैन ।
सदस्यसचिव घिसिङको मुख्य प्राथमिकता अन्तर्राष्ट्रिय प्रतियोगिता
नवनियुक्त सदस्यसचिव घिसिङले ओलम्पिक, एसियन गेम्स र दक्षिण एसियाली खेलकुद (साग)लाई मुख्य प्रथामिकतामा राखेर काम गर्ने प्रतिबद्धता जनाएका छन् ।
मंगलबार राखेपमा सदस्यसचिवको पदभार ग्रहण गरेपछि घिसिङले अन्तर्राष्ट्रिय प्रतियोगितामा सहभागिता जनाउने खेल र खेलाडीको प्रशिक्षणलाई विशेष प्रथामिकतामा दिइने बताए । “अन्तर्राष्ट्रिय प्रतियोगितामा नेपालले पदक जित्न सकेको छैन । जिते पनि अत्यन्तै कम छ । त्यसको मुख्य कारण कमजोर तयारी हो । हामी अन्तर्राष्ट्रिय प्रतियोगितामा सहभागिता जनाउने खेल र खेलाडीको तयारीलाई मुख्य प्रथामिकतामा राखेर काम गर्नेछौँ,” घिसिङले भने ।
नवौँ खेलकुद प्रतियोगिता पहिलो योजना
सदस्यसचिव घिसिङले आफूले उमेदवारी दिने समयमा नै चार वर्षका लागि १६ पेज लामो कार्ययोजना प्रस्तुत गरेको बताए । जसमा नवौँ राष्ट्रिय खेलकुद प्रतियोगिता पहिलो योजना भएका बताए ।
उनले आफू नियुक्त हुनुपूर्व नै नवौँ राष्ट्रिय खेलकुद प्रतियोगिता भइसक्नुपर्ने भए पनि अहिलेसम्म नभएको बताए । “मेरो पहिलो प्राथमिकता नवौँ राष्ट्रिय खेलकुद प्रतियोगितालाई सफलतापूर्वक सम्पन्न गर्ने हो । त्यसका लागि चाँडोभन्दा चाँडो सबै सरोकारवालासँग छलफल गर्नेछु,” घिसिङले भने ।
सरकारले हटाउने गरी कुनै कमजोरी गर्दिनँ
सरकारले राखेप सदस्यसचिवले गरेको काम चित्त नबुझेमा जति बेला पनि हटाउन सक्ने प्रवधान भएकाले आफूले त्यस्तो खाले कुनै कमजोरी नगर्ने घिसिङले बताए । संघहरूलाई साथमा लिएर कार्ययोजना बनाउने उनले उल्लेख गरे ।
“मलाई सरकारले दिएको जिम्मेवारी पूर्ण रूपमा पालना गर्नेछु । नयाँ कार्ययोजनाअनुसार अगाडि बड्नेछु । सरकारलाई चित्तबुझ्दो काम गरेर देखाउनेछु । त्यसपछि हट्ने र हटाउने भन्ने कुरो उठ्ने छैन,” घिसिङले भने ।
