काठमाडौं । हुम्लाले सरकारसँग हारगुहार मागेको एक साता बित्दा पनि खाद्यान्न पुगेको छैन ।

हेलिकोप्टर आएर खाद्यान्न ढुवानी गर्ने आशामा १४ जना लिमीवासी हिल्सामा पर्खिरहेका छन् । अर्कातर्फ, हुम्ला पठाइने चामल धनगढी, सुर्खेत, नेपालगन्जका गोदाममा थन्किएको छ ।

भोकमरीको पीडा बोकेर काठमाडौं आएका जनप्रतिनिधि काठमाडौंमै छन् । नाम्खा गाउँपालिका–६, लिमी गाउँमा खाद्यान्न ढुवानीमा भइरहेको ढिलासुस्तीलाई सरकारले बेवास्ता गरेको हुम्लाका जनप्रतिनिधिको भनाइ छ ।

नाम्खा गाउँपालिका–६ का वडाध्यक्ष पाल्जोर लामा बाध्यताले सरकारसँग हारगुहार माग्नुपरेकोे बताए । ‘‘कोरोना महामारीपछि चीनले नाकाबन्दी नगरेको भए हामीलाई नेपाल सरकारसँग हात थापिरहनु पर्दैनथ्यो । कोरोना फैलने डरले नाकाबन्दी हुँदा भोकमरीको सामना गर्नुपर्‍यो । सरकारले भोकमरीको पीडा सुन्नेबित्तिकै खाद्यान्न पठाउनुपर्नेमा चीनले राहतस्वरूप पठाएको खाद्यान्न पनि ढुवानी गरिदिएको छैन,” लामाले भने ।

जनप्रतिनिधिका अनुसार भोकमरीको पीडा गृह मन्त्रालयमा राखेकै पछिल्लो दिन खाद्यान्न ढुवानी गर्ने भनिएको थियो । तर, त्यसको करिब एक साता भइसक्दा पनि ढुवानी गरिएको छैन ।

गएको मंगलबार संघीय सांसद छक्कबहादुर लामा र वडाध्यक्ष लामाले अर्थ मन्त्रालय र गृह मन्त्रालय पुगेर तत्काल खाद्यान्न ढुवानी गर्न आग्रह गरेका थिए । गृहले मंगलबारै तत्काल खाद्यान्न ढुवानी गर्न जिल्ला प्रशासन कार्यालय हुम्लालाई पत्र काटेको थियो । तर, हेलिकोप्टर नपठाएको भन्दै खाद्यान्न ढुवानी गरिएन ।

वडाध्यक्ष लामा खाद्यान्न ढुवानी भएपछि मात्रै गाउँ जाने अडानमा काठमाडौंमा आफन्तकोमा बसेका छन् । ‘‘एक साता पुगिसक्यो, हुम्लाको भोकमरी कसले सुन्ने ? कसले बुझ्ने ? वास्तविक अवस्था सरकारले जान्न चाहेन । सरकारले तत्काल खाद्यान्न ढुवानी गर्ने आश्वासन मात्रै दियो,” उनले भने ।

गाउँमा भोकमरी हुँदा पाँच हजार मिटर उचाइमा पर्ने न्यालुलेकबाट तीन फिट हिउँ पन्छाउँदै ३० जना लिमीवासी सदरमुकामसम्म आएका थिए । ‘‘सदरमुकामको खाद्य संस्थानमा खाद्यान्नको अभाव रहेछ । अन्ततः ३० जना नै काठमाडौं आउन सम्भव थिएन । मलाई कहाँ गएर पीडा सुनाउने भन्ने थाहा थिएन । त्यसपछि संघीय सांसद छक्कबहादुर लामालाई भेट्न गएँ र उहाँसँगै काठमाडौंसम्म आएँ,” वडाध्यक्ष लामाले भने ।

गएको कात्तिकमा नाम्खा गाउँपालिकालाई चीनले राहतस्वरूप चार हजार ५०० बोरा मैदा र करिब ८०० बोरा चामल पठाएको थियो । मंगलबार गृह मन्त्रालयले जिल्ला प्रशासन कार्यालय हुम्लालाई चीनले सहयोग गरेको राहत हेलिकोप्टरमार्फत लिमीमा पुर्‍याउन निर्देशन दिएको थियो ।

गृह मन्त्रालयले गएको शुक्रबार खाद्यान्न ढुवानीका लागि हेलिकोप्टरको व्यवस्था गर्न रक्षा मन्त्रालयलाई पत्र काटेको थियो । उक्त पत्रानुसार आज खाद्यान्न ढुवानी हुनपर्नेछ ।

हुम्लाका प्रमुख जिल्ला अधिकारी गणेश आचार्यले गाउँमा खाद्यान्न ढुवानी गर्न सबै तयारी पूरा गरिएको जानकारी दिए । ‘‘काठमाडौंबाट मौसम खराब भएकाले हेलिकोप्टर पठाउन नसकिएको खबर आएको छ । हेलिकोप्टर नआए खाद्यान्न ढुवानी आज पनि गर्न सकिँदैन । शुक्रबार हेलिकोप्टर पठाउने भनिएको थियो । तर, अहिलेसम्म हेलिकोप्टर आएको छैन,” उनले भने ।

गृह मन्त्रालयका प्रवक्ता फणिन्द्रमणि पोखरेलका अनुसार खाद्यान्न पुर्‍याउन आज हेलिकोप्टर पठाउने भनिएको छ । ‘‘बिहानदेखि मौसमले साथ दिएको छैन । मौसम अनुकूल भए दिउँसोतिर हेलिकोप्टर पठाएर खाद्यान्न पुर्‍याउन सकिन्छ । आज हेलिकोप्टर पठाउन सकिएन भने भोलि पठाउछौँ,” उनले भने ।

गृह मन्त्रालयका अनुसार जिल्ला प्रशासन कार्यालय हुम्लाको समन्वयमा खाद्यान्न लिमीसम्म पुर्‍याइनेछ ।