काठमाडौं । साविक उपविजेता टोली क्रोएसियाले आइतबार राति रुसलाई १–० ले हराउँदै अर्को वर्ष कतारमा हुने फिफा विश्वकप–२०२२ मा स्थान पक्का गरेको छ । 

क्रोएसियाका लागि घरेलु मैदानमा रुसका फेडोर कुद्रेशोभले ८१औँ मिनेटमा गरेको आत्मघाती गोल निर्णायक बनेको थियो ।

जितसँगै युरोपियन छनोट प्रतियोगिताको समूह ‘एच’ मा रहेको क्रोएसियाले शीर्ष स्थानमा रहेर कतारको टिकट काटेको हो । क्रोएसियाले दश खेलबाट २३ अङ्क जोडेको छ । जुन दोस्रो स्थानको रुसको भन्दा एक अङ्कले माथि हो । 

युरोपियन छनोट प्रतियोगिताको समूह विजेताले टोलीले सिधै विश्वकपमा स्थान बनाउने छ । उपविजेताले प्लेफबाट गुज्रिनुपर्छ । 

रुसले आज बराबरी गरेमात्र पुग्थ्यो भने क्रोएसियालाई जित्नै पर्ने बाध्यता थियो । तर, अन्तिम समयमा सम्हालिन नसक्दा रुस प्लेअफबाट गुज्रिनु परेको छ । 

रुस २०१८ को आयोजक राष्ट्र हो । विश्वकपमा रुस क्वार्टरफाइनलमा क्रोएसियासँगै टाइब्रेकरमा ४–३ ले पराजित भएको थियो । फाइनलमा खेलेको क्रोएसिया फ्रान्ससँग ४–२ ले हरेपछि उपविजेतामा चित्त बुझाउनुपरेको थियो । 

यसअघि साविक विजेता फ्रान्स, बेल्जियम, ब्राजिल, डेनमार्क, जर्मनी र आयोजक कतारले विश्वकप–२०२२ मा स्थान पक्का गरिसकेका छन् ।