काठमाडौं । अलिख नेपाल फुटबल संघ (एन्फा) का अध्यक्ष कर्माछिरिङ शेर्पाले मुख्य प्रशिक्षक अब्दुल्लाह अल्मुताइरी अब दुई वर्ष नेपाल बस्ने बताएका छन् ।  

साफ च्याम्पियनसिपमा उपविजेता नेपाली फुटबल टोलीलाई आज नेपाली कांग्रेसको भ्रातृ संगठन तरुण दलले आयोजना गरेको सम्मान कार्यक्रममा अध्यक्ष शेर्पाले अल्मुताइरीले अझै दुई वर्ष नेपाली टोलीको जिम्मेवारी सम्हाल्ने बताए । उनले थपे, “कतारमा मुख्य प्रशिक्षकले दुई वर्ष नेपाल बस्न सहमत भएका छन् । मैले त्यो व्यवस्थान मिलाएर फर्किएको छु ।”

अल्मुताइरीले माल्दिभ्समा सम्पन्न साफ च्याम्पियनसिपका दौरान आफू कहिल्यै नेपाल नफर्किने घोषणा गरेका थिए । साफ च्याम्पियनसिपको तेस्रो खेलमा भारतसँग पराजित भएपछि प्रशिक्षक अल्मुताइरीको सामाजिक सञ्जालमा चर्को आलोचना भएको थियो । लिग चरणको अन्तिम खेलमा बंगलादेशसँग १–१ को बराबरी खेल्दै पहिलोपटक साफ च्याम्पियनसिपको फाइनलमा स्थान बनाएपछि अल्मुताइरीले पद छाडेको घोषणा गरेका थिए । 

तथापि अल्मुताइरीको एन्फासँग २०२२ सेप्टेम्बरसम्म सम्झैता छ । अब ११ महिनामात्र सम्झौता अवधि बाँकी रहेपनि एन्फा अध्यक्ष शेर्पाले भने अल्मुताइरी दुई वर्षका लागि नेपाल फर्किने बताएका छन् । 

बंगलादेशविरुद्धको खेलपछि नेपाल नआउने घोषणा गरेपनि अल्मुताइरीले भारतविरुद्धको फाइनल खेलपछि नेपाल फर्किने संकेत दिएका थिए । उनको राजीनामाबारे सोधिएको प्रश्नमा अल्मुताइरीले भनेका थिए, “अहिले म थकित छु । दुई साताको आरामपछि नेपाल फर्किने विषयमा सोच्नेछु ।”

अल्मुताइरी माल्दिभ्सबाट नेपाल नफर्किएर सिधै कतार गएका थिए । एन्फा अध्यक्ष शेर्पा पनि माल्दिभ्समा साफको बैठक सकेर कतार हुदै नेपाल फर्किएका हुन् ।