काठमाडौं । सुन्दर सुदूपश्चिम । सुन्दै आनन्द लाग्ने नाम । हरियाली प्रकृति र विभिन्न मन लोभ्याउने रमणीय दृश्य । सुदूरपश्चिमको अस्थायी राजधानी धनगढीको परिचय क्रिकेटसँग जोडिएको छ ।

‘दी सिटी अफ क्रिकेट’ भनेर चिनिने यस ठाउँले क्रिकेटलाई नयाँ उचाइ र खेल व्यावसायिकतालाई नौलो परिचय दिएको छ । धनगढी प्रिमियर लिग (डीपीएल), धनगढी क्रिकेट लिगजस्ता लिगहरू त्यसका उदाहरण हुन् ।

डीपीएलसँग जोडिएको छ फाप्ला क्रिकेट मैदान । जग्गा विवादका कारण लामो समयदेखि फाप्ला क्रिकेट मैदानको निर्माणकार्य अघि बढ्न सकेको छैन । बर्सेनि बजेट छुट्ट्याउँदा पनि मैदान निर्माणमा खर्च हुन सकेन ।

चालु आर्थिक वर्षमा पनि फाप्लाका लागि प्रदेश सरकारले बजेट छुट्ट्याएको छ । तर, काम अगाडि बढ्न नसक्दा रंगशाला पुरानै अवस्थामा छ ।

फाप्ला अन्तर्राष्ट्रिय क्रिकेट रंगशाला निर्माण गर्ने लक्ष्यका साथ डीपीएल सुरु गरिएको थियो । “एसपीए कप र डीपीएलका केही सिजन धनगढीकै अन्य ठाउँमा सकिए पनि डीपीएल जन्मनुको एक आधार धनगढी अन्तर्राष्ट्रिय क्रिकेट रंगशाला हो । फाप्लाका लागि नै हामीले क्रिकेटको सुरुवात गरेका थियौँ,” धनगढी क्रिकेट एकेडेमीका अध्यक्ष सुवास शाहीले भने ।

कतिपय क्रिकेटरका लागि पहिलो खेलको माध्यम बनेको छ फाप्ला । “यदि, फाप्ला अन्तर्राष्ट्रिय रंगशाला बनेमा धनगढीलाई मात्र होइन, सम्पूर्ण नेपाली क्रिकेट खेलाडी र क्रिकेटपारखीलाई राहत पुग्नेछ,” शाहीले भने ।

‘ड्रिम फाप्ला’को योजना लिएर अघि बढेको फाप्ला अन्तर्राष्ट्रिय क्रिकेट रंगशालाको निर्माणकार्य नीतिगत अड्चनका कारण अड्किएको बताइन्छ । “डीपीएलको एउटा सिजनमा पाँच करोड खर्च गर्न सक्ने हामी रंगशाला निर्माणमा जति पनि लगानी जुटाउन सक्छौँ । पैसाले रंगशाला निर्माणकार्य रोकेको छैन । जग्गा प्रक्रियाले रोखिएको हो,” अध्यक्ष शाहीले भने ।

मन्त्रिपरिषद्बाट जग्गाको विषय समाधान भए आफूहरू सोही दिनदेखि काममा लाग्ने उनको भनाइ छ । उनले भने, “जग्गा क्याबिनेटले पास गर्न बाँकी छ । त्यसपछि भोलिपल्ट नै हामीले रंगशाला निर्माणको काम थाल्नेछौँ । आर्थिक अभावका कारण रंगशाला निर्माणको काम रोकिन्छ भन्ने छैन ।”

रंगशालाका लागि प्रदेश सरकारले बजेट छुट्ट्याए पनि त्यसको खर्चका लागि भने बेग्लै मापदण्ड बनाउनुपर्ने अवस्था छ । यसअघि, डीपीएल हुँदाताका धनगढी क्रिकेट एकेडेमीले मैदान केही रूपमा तयार पारे पनि थप प्रगति भएको छैन ।

“सरकारले बजेट विनियोजन गरे पनि उपभोक्ता समूहबाट काम गर्नुपर्ने हुन्छ । काम भनेको समयमा हुन्छ भन्ने पनि छैन । काम गर्न लामो समय लाग्छ । कहिले त काम नै नभएर बजेट फ्रिज जाने अवस्था पनि आएको छ । त्यसैले हामीले जग्गा पास हुने समयलाई कुरेका छौँ । त्यसपछि काम सुचारु हुनेछ,” शाहीले भने ।