काठमाडौं । अग्लो कद, हँसिलो अनुहार । सानैदेखि भलिबलप्रतिको लगाव । १५ वर्षको उमेर लाग्दा नै राष्ट्रिय टोलीमा स्थान बनाउन सफल उषा भण्डारी विभागीय क्लब नेपाल पुलिसकी खेलाडी हुन् ।

क्लबको पहिलो रोजाइमा रहेकी उषाको एउटै लक्ष्य राष्ट्रिय टोलीलाई साग भलिबलको उपाधि दिलाउने भन्ने हो । अहिले उनी त्यसैका लागि मिहिनेत गरिरहेकी छन् ।

ओपन स्पाइकरको भूमिका निभाउन सहज ठान्ने उषा घरेलु प्रतियोगिता र अन्तर्राष्ट्रियस्तरमा राम्रो खेलाडीको छवि बनाउन सफल छिन् । नेपाल पुलिस एकेडेमीकी उत्पादन उषा सानैदेखि भलिबलमा लाग्ने पारिवारिक माहोलमा हुर्किइन्, जसले उनलाई उत्कृष्ट प्रदर्शन गर्न प्रेरित गर्‍यो । एक समय ब्याडमिन्टन खेल्ने मनसाय बनाएकी उषालाई अहिले भलिबल निकै प्यारो छ ।

“मलाई भलिबलमै राम्रो भविष्य छ भन्ने लाग्यो, त्यसैले यही रोजेँ,” उनी भन्छिन्, “पहिले ब्याडमिन्टन खेल्ने सोच बनाएकी थिएँ । अब भलिबलमै केही गरेर देखाउने लक्ष्य छ । भलिबलमार्फत राष्ट्रलाई योगदान दिने उद्देश्य छ ।”

उनको खेल प्रदर्शन र खुबीलाई उमेरसँग तुलना गर्दा सबै चकित पर्छन् । १७ वर्षको कलिलो उमेर र परिपक्व हुँदै गएको खेलले भलिबल समर्थकलाई उत्साहित बनाउँछ ।

तनहुँ घर भएकी उषाले आफ्नो जादुमय खेल प्रदर्शन गर्दै १४औँ ढोरपाटन राष्ट्रिय महिला भलिबल लिगमा उत्कृष्ट स्पाइकरको पुरस्कार जितेकी थिइन् । पहिलो खेलबारे सम्झिँदै उषा भन्छिन, “केही डर लागेको थियो । विस्तारै त्यो डर पनि हट्दै गयो । अब भलिबल कोर्टमा जाँदा कसरी राम्रो खेल पस्किने भन्नेतिर मात्र ध्यान जान्छ । जसरी पनि उत्कृष्ट खेल पस्किने मेरो उद्देश्य हुन्छ ।”

घरेलु प्रतियोगिता न्यु डायमन्ड कप, सभामुख कप, प्रधानमन्त्री कप, एनभीए भलिबल च्याम्पियनसिप, ढोरपाटन राष्ट्रिय भलिबलमा उनले आफ्नो खेलकौशल देखाइसकेकी छन् । “म सुरुवाती अवस्थामा छु । अझै धेरै कुरा सिक्न बाँकी छ । सानो उमेरमै राष्ट्रिय टोलीमा छनोटमा पर्दा भलिबलप्रति अझै उत्साह जागेर आएको छ,” उनले भनिन् ।

सात वर्षको उमेरबाट खेल क्षेत्रमा हामफालेकी उनले सानै उमेरमा राष्ट्रिय टोलीमा पर्नु अवसर र चुनौती उत्तिकै देखेकी छन् । भन्छिन्, “सानै उमेरमा राष्ट्रिय टोलीमा स्थान बनाएँ । यो मेरो लागि अवसर र चुनौती दुवै हो । क्लबका लागि पनि मैले आफूले सकेजति प्रदर्शन गर्न सकेकी छु । अब मेरो मुख्य लक्ष्य भनेको राष्ट्रिय टोलीका लागि अन्तर्राष्ट्रिय उपाधि दिलाउनु हो । त्यसकै लागि अहिलेबाट राम्रो तयारी गरिरहेकी छु ।”

उषाले सिनियर टोलीबाट भलिबल खेल्न थालेको तीन वर्ष भयो । उनले पहिलोपटक आदि आवादि भलिबल प्रतियोगिताबाट पुलिसको सिनियर टोलीमा डेब्यु गरेकी थिइन् । सिनियर टोलीमा स्थान बनाउन उनलाई चुनौती थियो । उनको खेल लगावले त्यो चुनौती सजिलै पार भयो ।

“मभन्दा अनुभवी दिदीहरू हुनुहुन्थ्यो । म त्यही भएर कोर्टमा बस्थेँ । मौका पाएँ अनि खेल देखाएँ,” उनले थपिन्, “भलिबलले मलाई उषाको परिचय दिएको छ । मैले अब भलिबलमै लागेर देश र नेपाली भलिबलका लागि केही गर्ने सोच बनाएकी छु । नेपाललाई अब सागमा उपाधि दिलाउने योजना रहेको छ ।”

उषाले भर्खरै मात्र काठमडौंमा सम्पन्न छैटौँ संस्करणको एनभीए महिला तथा पुरुष भलिबल च्याम्पियनसिपमा उत्कृष्ट प्रदर्शन गरेकी थिइन् । तर, उनको टोली नेपाल पुलिसले उपाधि जित्न भने सकेन । पुलिस तेस्रो स्थानका लागि भएको खेलमा विभागीय टोली एपीएफसँग पराजित भयो ।

उषाले अब आउने प्रतियोगितामा उत्कृष्ट प्रदर्शन गर्ने योजना बनाएकी छन् । उनले पुलिसका लागि पनि उत्कृष्ट प्रदर्शन गर्ने लक्ष्य लिएकी छन् ।

“मेरो चाहना जति पनि प्रतियोगिताहरु खेल्छु, त्यसैमा आफूले उत्कृष्ट प्रदर्शन गरौँ भन्ने हुन्छ । कुनै खेलमा आफूले सोचेजस्तो प्रदर्शन हुँदैन,” उनले भनिन् ।