काठमाडौँ । मानव शरीरले कसरी तापक्रम र स्पर्श महसुस गर्छ भन्नेबारे खोज गरेका दुई जना वैज्ञानिकले संयुक्त रूपमा यस वर्षको ‘शरीर विज्ञान वा चिकित्सा’ तर्फको नोबेल पुरस्कार जितेका छन् ।

अमेरिकी वैज्ञानिकद्वय डेभिड जुलियस र आर्डेम पाटापौटियनलाई मानव शरीरले तापक्रम र स्पर्श महसुस गर्ने प्रक्रियामा गरेको कार्यका लागि सन् २०२१ को लागि नोबेल पुरस्कारबाट पुरस्कृत गरिएको हो । पाटापौटियन लेबनानमा जन्मिएका हुन् भने जुलियस अमेरिकामै जन्मिएका हुन् ।

यस खोजले दुखाइ अथवा मुटुरोगको पनि उपचार गर्न नयाँ पद्धतिको विकास गर्न सघाउ पुग्न सक्ने बताइएको छ ।

नोबेल पुरस्कार कमिटीका महासचिव (सेक्रेटरी जेनरल) थोमस पर्लम्यानले यो एउटा अत्यन्तै महत्वपूर्ण र गहीरो खोज भएको बताएका छन् ।

पुरस्कृत जोडीले एक करोड स्विडिस क्रोनर प्राप्त गर्नेछन् । द नोबेल प्राइजबाट ।