काठमाडौं । नेपाल क्रिकेट संघ (क्यान)का अध्यक्ष चतुरबहादुर चन्दले आज पदबाट राजीनामा दिएका सचिव असोकनाथ प्याकुरेल र उपाध्यक्ष राजुबाबु श्रेष्ठलाई निर्णय फिर्ता लिन अनुरोध गरेका छन् । हाल गृह जिल्ला रहेका अध्यक्ष चन्दले प्याकुरेल र श्रेष्ठको राजीनामा मिडियाबाटै थाहा पाएको बताए । उनले आफूसँग असन्तुष्ट हुनुपर्ने कुनै कारण नरहेको पनि बताएका छन् । 

‘‘हामीबीच बिहान लामो कुरा भएको थियो । क्यानमा निर्वाचित भएको दुई वर्ष अवधिमा हामीले गरेको कामबारे सबैलाई जानकारी गराउनका लागि मिडियाका साथीहरू बोलाएको छु भन्नुभएको थियो । त्यतिबेला राजीनामाबारे केही कुरा भएन,’’ अध्यक्ष चन्दले भने, ‘‘हामीबीच कुनै असमझदारी हुनुपर्ने कारण देख्दिनँ । त्यसैले उहाँहरूलाई आफ्नो निर्णय फिर्ता लिन अनुरोध गर्दछु ।’’

अध्यक्षले जस्तै सचिव प्याकुरेल र उपाध्याक्ष श्रेष्ठले पनि पदाधिकारीसँग कुनै तिक्तता नभएको दाबी गरेका थिए । तर, पछिल्लो समय अध्यक्षले एकलौटी निर्णय गरेका भन्दै सचिवलगायतका पदाधिकारी असन्तुष्ट रहँदै आएका थिए ।

‘‘मैले त सचिव र उपाध्यक्षलाई सबै किसिमको सम्मान र अधिकार प्रयोग गर्न दिएकै थिएँ । आईसीसी डेभेलपमेन्ट कमिटीमा अशोकजीलाई जिताउन पहल गरेकै हो । खाता सञ्चालनका लागि चेकमा हस्ताक्षर गर्न मैले उहाँलाई अधिकार दिएको छु । पैसा खर्च गर्न मैले उहाँलाई अधिकार दिएको छु । आईसीसीसँग सम्पर्क गर्ने जिम्मेवारी पनि मैले उहाँलाई नै दिएको छु,’’ अध्यक्ष चन्दले थपे, ‘‘त्यसैले हामीबीचको असमझदारीका कारण उहाँले राजीनामा दिएको भन्ने मलाई लाग्दैन । के कसो भएको हो त्यो मैले पनि बुझ्ने प्रयास गर्दैछु ।’’