दाङ । स्वास्थ्य सेवा र शिक्षालाई प्रभावकारी बनाउने गरी स्थापना भएको दाङको राप्ती स्वास्थ्य विज्ञान प्रतिष्ठान चौथो वर्षमा प्रवेश गरेको छ । एक प्रदेश एक स्वास्थ्य विज्ञान प्रतिष्ठानअन्तर्गत लुम्बिनी प्रदेशको स्वास्थ्य विज्ञान प्रतिष्ठान चार वर्षअघि दाङको घोराहीमा स्थापना भएको थियो ।
प्रदेशमै विशेषज्ञ चिकित्सकहरू उत्पादन हुन सकून् र सस्तो तथा सुलभ शुल्कमा आम नागरिकको पहुँचमा चिकित्सकीय अध्ययन पुगोस् भनेर तत्कालीन प्रधानमन्त्री सुशील कोइरालाले दाङमा उक्त प्रतिष्ठान स्थापना गर्ने निर्णय गरेका थिए । स्थापना भए पनि एक वर्ष राप्ती उपक्षेत्रीय अस्पतालसँगको स्वामित्व विवादले ०७५ साल असोज १२ गतेदेखि मात्रै प्रतिष्ठान अस्तित्वमा आएर कार्यसम्पादन सुरु गरिएको थियो । त्यही अस्तित्वमा आएको मितिलाई प्रतिष्ठानले स्थापना दिवसको रूपमा मनाउँदै आएको छ ।
स्थापनाको चार वर्षमा सकारात्मक तथा नकारात्मक दुवै पक्ष र विषयले सधैँ प्रतिष्ठानको चर्चा भइरहेको छ । कहिले पदाधिकारीको गतिविधि त कहिले आन्दोलनले चर्चामा आइरहने प्रतिष्ठान शैक्षिक गतिविधि सञ्चालनमा भने क्रियाशील हुन सकेको छैन । पटक–पटक उपचार र पूर्वाधारका विषयमा समेत प्रतिष्ठान विवादित बन्दै आयो ।
प्रतिष्ठानले चौथो स्थापना दिवस मनाउँदै गर्दा राप्ती स्वास्थ्य विज्ञान प्रतिष्ठानकी उपकुलपति प्रा. डा. संगीता भण्डारीको कार्यकाल पनि अन्त्यतिर पुगेको छ । उपकुलपति भण्डारीले आफ्नो कार्यकालमा प्रतिष्ठानको बलियो फाउन्डेसन तयार भएको बताएकी छन् ।
पहिले पूर्वाधार तयार भएपछि मात्रै शैक्षिक कार्यक्रमको अनुमति पाइने भएको हुँदा प्रतिष्ठान हस्तान्तरण भएको तीन वर्षमा पूर्वाधार निर्माणमा समय दिएको र अब शैक्षिक गतिविधि सञ्चालन हुने उनले बताइन् । “यो अवधिमा प्रतिष्ठानको धेरै उपलब्धि भएको छ,” उनले भनिन्, “पूर्वाधार निर्माण, विशेषज्ञ चिकित्सक व्यवस्थापन, आधुनिक उपकरण व्यवस्थापन, सेवा सुधार, अक्सिजन प्लान्ट निर्माणलगायत महत्त्वपूर्ण कार्यहरू भएको छ ।” उनले शैक्षिक गतिविधि सञ्चालन गर्न जग्गाको समेत व्यवस्थापन गरिएको जानकारी दिइन् ।
३०० बेडको अस्पताल पूर्वाधार तयार हुनासाथ शैक्षिक गतिविधि अघि बढ्ने उनले बताइन् । “३०० बेडको अस्पतालको पूर्वाधार निर्माण गरेर मात्रै शैक्षिक गतिविधि र कार्यक्रम सञ्चालन हुने हुन्छ । पूर्वाधार भएन भने अनुमति पाइँदैन, हाम्रो पनि त्यही भएको हो,” उनले भनिन् ।
उपकुलपति भण्डारीले सिनेटले पूर्वाधार निर्माण शैक्षिक कार्यक्रम सञ्चालन गर्ने निर्णय गरेको जानकारी दिइन् । अस्पतालको स्वास्थ्य सेवा सुधारदेखि दक्ष जनशक्तिको उचित व्यवस्थापन गरेर सेवा प्रवाहलाई प्राथमिकता दिइएको उनले बताइन् ।
प्रतिष्ठानमा १० बेडको आईसीयू सञ्चालनमा छ । चारवटा नयाँ अपरेसन थिएटर सञ्चालनमा ल्याइएको छ । थप भौतिक पूर्वाधार निर्माणका लागि आवश्यक जग्गा प्राप्ति अन्तिम चरणमा पुगेको उपकुलपति भण्डारीले जानकारी दिइन् ।
अत्याधुनिक प्रयोगशालादेखि थप १५ बेडको आईसीयू सञ्चालनको तयारी गरिएको प्रतिष्ठानले जनाएको छ । प्रतिष्ठानको सिनेटबाट अत्याधुनिक ४०० शय्याको अस्पताल बनाउने प्रस्ताव पारित भएको छ ।
