काठमाडौं । आकांक्षा पलायो, उनले आँटिन् । चित्त नबुझ्नेले हतोत्साही गर्ने प्रयास गरे । तर, उनले हारिनन् । अन्ततः सपना साकार भयो । कीर्तिमान कायम भयो । नेपाली ओलम्पिकको इतिहासमा सफल खेलाडी बन्न सफल भइन् पलेसा गोभर्दन (पारातेक्वान्दो) । फरक क्षमताबाट आएकी पलेसालाई यति चाँडै सफलता मिल्छ भन्ने लागेको थिएन । तर, उनले चाँडै सपना चुमिन् । 
 
उनलाई हौसला र प्रेरणा दिलाउने हातहरुले कहिले हार्न दिएनन् । विद्यालयबाटै तेक्वान्दो खेलमा प्रवेश गरेकी पलेसाले खेल जीवनको सुरुवात भने कितावी पानाबाट गरिन् । पलेसा विद्यालय स्तरमा हुँदा अतिरिक्त क्रियाकलाप अन्तर्गत ‘मार्सलआर्ट’ विधाको तेक्वान्दो रोजिन् ।

पलेसालाई सुरुमा पारा तेक्वान्दोको बारेमा जानकारी थिएन । उनलाई शिक्षकहरुले त्यसबारे जानकारी दिलाए । कक्षा पाँचमा पड्दा तेक्वान्दो खेलेकी पलेसाको पहिलो अन्तर्राष्ट्रिय प्रतियोगिताका रुपमा तेस्रो दक्षिण एसियाली च्याम्पियनसिप भयो ।
 
उक्त च्याम्पियनसिप पलेसाले १३ वर्षको उमेरमा खेलेकी थिइन् । अन्तर्राष्ट्रिय प्रतियोगिता खेलेको पाँच वर्षपछि उनलाई ओलम्पिक खेल्ने अवसर जुर्यो । वाइल्डकार्डबाट इन्ट्री पाएकी पलेसाले नेपाली खेलकुदमा नयाँ इतिहास रचिन् । 

पलेसाले पाराओलम्पिकतर्फ ‘४४ के’ अन्तर्गत प्रतिस्पर्धा गरिन् । स्वर्ण पदक जित्नबाट चुकेकी पलेसाले कास्य पदकका लागि भएको प्रतिस्पर्धामा पराजित हुन पर्यो ।
 
र, पलेसा नेपाली ओलम्पिक इतिहासमा दुई फाइट जित्ने पहिलो नेपाली खेलाडी बनिन् । पहिलो खेलमा बेलायती खेलाडी मुनरो बेथसँग पराजित भए पनि रिपिचेजमा काश्य पदक भिडन्त सम्मको यात्रा तय गरेकी थिइन् । त्यसक्रममा उनले अमेरिका र सर्वियाका खेलाडीलाई हराएकी थिइन् ।

काश्य पदकका लागि पलेशाले चीनकी खेलाडी ली युजीविरुद्ध प्रतिस्पर्धा गरेकी थिइन् । १२–९ को स्कोरमा पराजित भइन् । 

काश्य पदकका लागि भएको प्रतिस्पर्धामा पहिलो राउन्डमा ४–२ को अग्रता लिएकी थिइन् । दोस्रो राउन्डमा ५–० ले हारेपछि तेस्रो खेलमा ५–५ को बराबरी गरे पनि समग्रमा १२¬–९ को स्कोरमा हारेकी थिइन् ।
 
“विश्व वरीयताकै दोस्रो स्थानमा रहेकी युजीविरुद्धको खेल मेरो लागि सहज भने थिएन । पहिलो राउन्डमा अग्रता बनाएपछि केही आशा थियो । तर, एकपटक लडेपछि मेरो अंक काटियो त्यसपछि युजीले जित निकाल्न सफल भइन्,” पलेसाले मन अमिलो पारिन् । 

 
पलेसाले चौथो एसियन च्याम्पियनसिपमा भने ब्रन्ज मेडल जित्न सफल भएकी थिइन् । त्यसपछिको उनको ओलम्पिक नै अन्तर्राष्ट्रिय प्रतियोगिता हो । जसमा उनले उत्कृष्ट प्रदर्शन गरिन् । पलेसा आफूले गरेको उत्कृठ प्रदर्शनमा सन्तुस्ट छैनन् तर, उनलाई आगामी दिनमा सफलता मिल्ने कुरामा भने पूर्ण विश्वास छ । 

“कम तयारी थियो । तर, मलाई पूर्ण विश्वास थियो । सबैले म माथि विश्वास गरेका थिए । मैले स्वर्ण जित्न भने सकिनँ । तर कास्यका लागि भएको प्रतिस्पर्धामा मेरो मिहिनेत पुगेन । अब आउने प्रतियोगितामा भने धेरै तयारी गरेर जाने योजना बनाएकी छु,” पलेसाले भनिन् । 

पलेसा आफ्नो प्रदर्शनलाई तिखार्दै जाने र नयाँ सफलताको लागि तयार हुने योजनामा छिन् । उनलाई ओलम्पिकले खेल प्रदर्शन र नयाँ अनुभवका लागि धेरै सहयोग पुर्यायो । भलै उनले सफलता हात पारिनन् तर, उनी अर्काे चुनौतीका तयार छिन् । 
भनिन्छ, मानिसलाई मिहिनेत र पूर्ण आत्मविश्वासले सफल बनाउँछ । कुनै लक्ष्य लिएपछि मानिसलाई सफल बनाउन आत्मविश्वास पनि चाहिन्छ । पलेसाको हकमा पनि अहिले आत्मविश्वास बडेको छ । सानो उमेरमा पाएको सफलताले आगामी यात्रा सफल बन्ने उनको बुझाइ छ ।
 
“नयाँ चुनौतीका लागि म तयार छु । अब कुनै पनि अन्तर्राष्ट्रिय प्रतियोगिता खेल्नु परेमा कम तयारीका कारण असफल हुनु नपरोस् भन्ने मेरो बझाइ छ । त्यसैले आजैदेखि मैले सोही अनुसारले तयार पारेकी छु । सबैको हौसलाले मलाई आत्म विश्वासी बनाएको छ,” पलेसाले भनिन् ।

पलेसा अहिले आफूजस्तै फरक क्षमता भएका व्यक्तिहरुका लागि उदाहरण बनेकी छन् । उनले पाएको सफलताले पारा खेलकुदमा लाग्ने सबैको मनोबल बड्ने छ । पलेसाको चाहना पनि तेक्वान्दो या खेल नभई सबै ठाउँमा फरक क्षमता भएका व्यक्तिहरु आउन् भन्ने चाहना छ । 

पलेसा मुस्कुराउँदै भन्छिन्, “इच्छा र चाहना राख्नुपर्छ गर्न नसकिने केही छैन भन्ने मलाई लामग्न थालेको छ । पारा खेलकुदमा आउन चाहने व्यक्तिले इच्छा, चाहनासहित लगाव पनि राख्नु पर्छ । सफलता आवश्य हात पर्नेछ ।”
 
पलेसा अहिले आफ्नो कुराहरु सबैले सुनिदिने वातावरण भएकोमा खुसी छन् । उनलाई हाल सम्मान गर्ने र हौसला दिने व्यक्तिको कमी छैन । यही हौसला र प्रेरणाले नै आगामी दिनमा सफलता मिल्ने उनको विश्वास छ ।