पाेखरा । पोखरा महानगरपालिकाको झण्डै ८ करोड रुपैयाँ राजस्व गायब भएको छ । राजस्व सङ्कलन खातामा देखाइएको रकम र आम्दानी देखाइएको रकममा ७ करोड ८१ लाख रुपैयाँको फरक छ ।

गत वर्ष पनि पोखरा महानगरपालिकामा १३ करोड रुपैयाँ राजस्व गायब भएको थियो । महालेखाको ०७५/७६ को प्रतिवेदनअनुसार महानगरपालिकामा १ अर्ब ३९ करोड रुपैयाँ आम्दानी भएको उल्लेख गरिएको थियो भने कोषमा भने १ अर्ब २६ करोड मात्रै दाखिला भएको थियो ।

१३ करोड राजस्व गायब भएको भनेर गत साल पनि महानगरको राजस्वबारे महालेखाको प्रतिवेदनले कैफियत उठाएको थियो ।

महालेखाले उक्त राजस्व छानबिन गर्न पनि भनेको थियो । पछि महानगरपालिकाले ११ करोड २८ लाख ६९ हजार रुपैयाँ राजस्व मिलान गरेको प्रतिवेदनमा उल्लेख छ ।

गत वर्षको प्रतिवेदनझैँ यसपटक पनि पोखरा महानगरपालिकाको झण्डै ८ कराेड राजस्व गायब भएको छ । गायब भएको राजस्वको छानबिन गर्न पनि महालेखाले सुझाव दिएको छ ।

मिलान गरेको ११ करोड २८ लाखसहित आ.व. ०७६/७७  मा महानगरले कुल १ अर्ब ३५ करोड राजस्व उठाएको थियो । तर, आम्दानीमा भने १ अर्ब २७ करोड रुपैयाँ मात्र देखाएको छ ।

“गत वर्षको महानगरको अन्तिम लेखापरिक्षण प्रतिवेदनमा बैंक दाखिला गरेको रकम भन्दा राजस्वको सफ्टवेयरमा रु १३ करोड १ लाख ८१ हजार फरक देखिएकोमा प्रतिक्रियाबाट आ.व. ०७६/७७ मा दाखिला भएको भनि रु ११ करोड २८ लाख ६९ हजार मिलान गरेको देखिन्छ । तर, आ.व. ०७६/७७ को सञ्चित कोषको विवरण अनुसार उक्त रकम आम्दानी बाँधेको प्रमाण देखिँदैन । यस वर्षको राजस्वको सफ्टवेयरमा कुल रु १ अर्ब २३ करोड ७२ लाख ४१ हजार रुपैयाँ उठाएको देखिएकोले गत वर्षको यस वर्ष दाखिला गरेको उल्लेख गरेको ११ करोड २८ लाख ६९ हजार रुपैयाँ थप गर्दा कुल १ अर्ब ३५ करोड १ लाख ११ हजार आम्दानी हुनुपर्थ्याे । तर, यस वर्ष राजस्व सङ्कलन खातामा १ अर्ब २७ करोड २० लाख ५ हजार रुपैयाँ मात्र आम्दानी देखाइएको छ,” प्रतिवेदनमा भनिएको छ ।

राजस्वमा फरक परेको उक्त रकमबारे छानबिन गर्न महालेखाले सुझाव दिएको छ ।

“सात करोड ८१ लाख ६ हजार रुपैयाँ फरक परेको देखिन्छ । यस सम्बन्धमा महानगरले छानबिन गर्नुपर्दछ,” प्रतिवेदनमा भनिएको छ ।

नाेट : यसअघि समाचारकाे हेडलाइनमा ८ कराेड हुनुपर्नेमा अन्यथा भएकाले सच्याइएकाे छ ।