विराटनगर । विद्यालय खुला गर्न विराटनगर महानगरपालिकाले छलफल सुरु गरेको छ । कोरोना संक्रमणको दोस्रो लहर सुरु भएसँगै महानगर क्षेत्रमा विद्यालय बन्द छन् । विद्यालय खुलाउने विषयमा महानगरले विषय विज्ञ र सरोकारवालाहरूसँग छलफल थालेको हो ।

महानगरका प्रमुख भीम पराजुलीले स्वास्थ्य मापदण्ड पालना गरेर शैक्षिक संस्था खुलाउने विषयमा सरोकारवालासँग छलफल भएको जानकारी दिए । 

“अनलाइन कक्षाको पहुँचमा महानगर क्षेत्रकै कतिपय विद्यार्थी नरहेको अवस्थामा विद्यार्थीको भौतिक उपस्थितिमै कसरी अध्यापन गराउन सकिन्छ भन्ने विषयमा परामर्श लिएका छौँ,” उनले भने ।

छलफलमा सहभागी विराटनगरका विद्यालय सञ्चालक, अभिभावक संघका प्रतिनिधि तथा प्रधनाध्यापकहरूले स्वास्थ्य मापदण्ड अपनाएर विद्यालय खोल्न सकिने सुझाव दिएका थिए । 

कोभिड कारण शैक्षिक क्षेत्रमा परेको समस्या र वैकल्पिक रूपमा भइरहेका अनलाइन कक्षाहरूले बालबालिकामा पारेको प्रभावका विषयमासमेत चिन्ता व्यक्त गरिएको छ । लामो समय मोबाइल, ल्यापटपको स्क्रिनमा बस्दा बालबालिकाको आँखा र मस्तिष्कमासमेत दीर्घकालीन असर पर्नेतर्फ पनि ध्यान दिनुपर्ने सहभागीको जोड थियो । 

वस्तुस्थिति अध्ययन गर्न महानगरको शैक्षिक प्रशासन महाशाखाका शिक्षा अधिकृत कृष्ण भट्टराईको संयोजकत्वमा ७ सदस्यीय समिति गठन गरिएको छ । समितिमा शिक्षक महासंघका बेदु खतिवडा, हिसानका भेषराज पोखरेल, एन–प्याप्सन र प्याप्सनका तर्फबाट इन्द्र राई, अभिभावक संघ नेपालका देवी पन्थी, सामुदायिक विद्यालय व्यवस्थापन समितिका कृष्ण गौतम सदस्य छन् । 

समितिले एक हप्ताभित्र विद्यालय सञ्चालन गर्न सकिने नसकिने विषयमा परामर्श तथा व्यवस्थापन कार्यढाँचा निर्धारण गर्ने बताइएको छ । विराटनगर महानगरपालिकामा अहिले पनि सक्रिय संक्रमितको संख्या दुई हजारभन्दा धेरै छ । दैनिक ५० जना हाराहारी संक्रमित थपिरहेका छन् ।