काठमाडौं । सरकारले प्रत्येक वर्ष प्रदान गर्दै आएको विभूषण (तक्मा) बनाउनकै लागि दुई वर्षमै १४ करोड १९ लाख ७७ हजार रुपैयाँ खर्च भएको छ । सरकारले विभूषण तयार गर्न आर्थिक वर्ष ०७५/०७६ मा पाँच करोड ६९ लाख ७७ हजार र ०७६/०७७ वर्ष आठ करोड ५० लाख खर्च गरेको हो ।

महालेखापरीक्षकको कार्यालयको ५८औँ प्रतिवेदनानुसार सरकारले ०७४/०७५ मा ५१४ जनालाई, ०७५/७६ मा ५१८ जनालाई र ०७६/०७७ मा ६३३ जनालाई विभूषित गर्ने निर्णय गरेको थियो ।

प्रतिवेदनमा १२९ मानपदवी, २२ अलंकार र ६१ पदकसमेत २१२ विभूषण तथा २२१ संविधानसभा पदक वितरण नभई मौज्दात रहेको  उल्लेख छ । विभूषित हुने संख्या र सो तयार गर्न लाग्ने खर्च बर्सेनि बढ्दै गएको समेत पाइएको छ । महालेखापरीक्षकको कार्यालयले विभूषित हुने संख्या निश्चित गरी खर्चमा नियन्त्रण गर्नुपर्ने समेत औँल्याएको छ ।

विभूषण ऐन, २०६४ मा चार प्रकारका १२ श्रेणीका मानपदवी, नौ प्रकारका अलंकार र १३ प्रकारका पदकबाट राष्ट्रिय जीवनका विभिन्न क्षेत्रमा विशिष्ट योगदान पुर्‍याउने व्यक्तिलाई विभूषण प्रदान गर्ने व्यवस्था छ ।

तर, पछिल्ला वर्षहरूमा सरकारले प्रदान गर्दै आएको विभूषण विवादमा पर्दै आएको छ । राजनीतिक दलका नेता–कार्यकर्ता र आसेपासेले विभूषण प्राप्त गर्ने तर राष्ट्रका लागि योगदान गरेका व्यक्तिलाई भने विभूषण प्रदान नगरिएको गुनासो बढ्दै गएको छ ।