काठमाडौं । नेपाली फुटबलमा चलिरहेको विवादको छानबिन गर्न गठित समितिले प्रतिवेदन बुझाउने तयारी गरेको छ । राष्ट्रिय खेलकुद परिषद् (राखेप) ले फुटबल विवादका लागि गत साउन १९ गते पुरेन्द्रबिक्रम लाखे संयोजकत्वको ७ सदस्यीय छानबिन समिति गठन गरेको थियो ।

समितिले तोकिएको समयमा प्रतिवेदन बुझाउन नसक्दा ७ दिनको समय थप गरेको थियो । गत शनिबार नै समितिले छानबिनको समय थप गरेको हो । सात दिनको समय मागेको समितिले पाँच दिनभित्र प्रतिवेदन बुझाउने तयारी गरेको छ । समितिले घटनामा संलग्न एन्फाका वरिष्ठ उपाध्यक्ष पंकज विक्रम नेम्वाङ, मुख्य प्रशिक्षक अब्दुल्लाह अलमुताइरीसहित १४ जनाको बयान लिएको थियो ।

बयान लिएका सबैबाट छानबिन प्रक्रिया पूरा नभएकाले समय थप गरेको थियो । समितिले तोकिएको समयभन्दा केही दिनअघि प्रतिवेदन बुझाइ सक्ने बताएको छ । समितिका सदस्य सुर्वण श्रेष्ठले छानबिनको सबै प्रक्रिया पूरा भएको र अब प्रतिवेदन बुझाउन मात्र बाँकी रहेको बताएका छन् । तोकिएको व्यक्तिहरूलाई मात्र छानबिन गर्दा सबै कुरा नआएकाले थप प्रष्ट हुन ७ जना व्यक्तिहरूको बयान लिएर सकेको उनले बताए । उनले उक्त बयानको प्रतिवेदन केही दिनमा मन्त्रालयमा बुझाइसक्ने बताए । 

“सबै व्यक्तिहरूसँग बयान दिएर सकिएको छ । अब हामी प्रतिवेदन बनाउने तयारीमा छौँ । बयानलाई लिपिबद्ध गरेपछि प्रतिवेदन तयार पार्नेछौँ । प्रतिवेदन तयार भएको दिन नै मन्त्रालयमा बुझाउने छौँ,” श्रेष्ठले बाह्रखरीसँगको कुराकानीमा भने । 

राखेपले फुटबल विवादको छानबिन गर्न समितिलाई ७ दिनभित्र अनुसन्धान प्रतिवेदन पेश गर्न भनेको थियो । राखेपले दिएको समय गत शुक्रबार नै सकिएको थियो । समितिले आजसम्ममा प्रतिवेदन तयार पारिसक्ने जनाएको छ । प्रतिवेदन तयार पार्ने बित्तिकै समितिले मन्त्रालयलाई प्रतिवेदन बुझाउने तयारी गरेको छ । छानबिन र प्रतिवेदनको विषयमा अब बैठक बस्ने समितिका अर्का सदस्यले बताए । 

“छानबिन सकिएको छ । बयानलाई लिपिबद्ध गरेपछि छानबिनलाई निष्कर्षमा पुर्याइसकेका छौँ । अब प्रतिवेदन तयार गरेर मन्त्रालयलाई बुझाउने तयारी छ,” ती सदस्यले थपे ।

एन्फा अध्यक्ष कर्माछिरिङ शेर्पाबाट बयान सुरु गरेको समितिले शुक्रबार अन्तिममा घटनाका केन्द्रीय पात्र वरिष्ठ उपाध्यक्ष र मुख्य प्रशिक्षकसँग सोधपुछ गरेको छ । नेपाली टोलीका मुख्य प्रशिक्षक अलमुताइरीले वरिष्ठ उपाध्यक्ष नेम्वाङका कारण आफूले काम गर्ने वातावरण नपाएको भन्दै राजीनामा दिने बताएका थिए । 

अलमुताइरीको फेसबुक पोस्टपछि एन्फा विवाद उत्कर्षमा पुगेको थियो । दुवै पक्षले घटनाको छानबिन गर्न भन्दै एन्फामा निवेदन दिएका थिए । जसमा दुई खेल पत्रकार समेतले प्रशिक्षकमाथि दुर्व्यवहार गरेको आरोप लागेको थियो । 

उक्त घटनापछि एन्फाको कार्यसमिति बैठकले घटनाको छानबिनका लागि युवा तथा खेलकुद मन्त्रालयलाई आग्रह गर्ने निर्णय गरेको थियो । सोही घटनालाई मन्त्रालयले छानबिनका लागि राखेपलाई पत्राचार गरेको थियो । मन्त्रालयले घटनाको छानबिन गरी सुझावसहितको प्रतिवेदन पेश गर्न राखेपलाई निर्देशन दिएको छ ।