काठमाडौं । कोरोना संक्रमणका कारण हालसम्म देशभरका २८ वटा सिनेमा हल बन्द भइसकेका छन् । काठमाडौंकै जय नेपाल, गोपीकृष्णका केही हल, कुमारी, सिद्धार्थलगायत सिनेमा हल बन्द भएका हुन् । 

कोरोना संक्रमणका कारण लामो समय हल सञ्चालन नहुँदा सिनेमा घरहरु बन्द हुन थालेका हुन् । चलचित्र संघका महासचिव अशोक शर्माका अनुसार हालसम्म २८ वटा सिनेमा हल बन्द भइसकेका छन् । 

एउटा सिनेमा हल बनाउन औसतमा ६ करोड रुपैयाँ लाग्ने चलचित्र विकास बोर्डका अध्यक्ष दयाराम दाहाल बताउँछन् । एउटा सिनेमा हलमा ६ करोड लगानी हुँदा २८ वटा हलको लागत एक अर्ब ६८ करोड रुपैयाँ हुन्छ । एक अर्ब ६८ करोडका हल बन्द भइसकेका छन् । 

पछिल्लो पटक काठमाडौंको सिद्धार्थ चलचित्र मन्दिर बन्द भएको छ । सधैंका लागि सिद्धार्थ चलचित्र मन्दिर बन्द भएको संघका महासचिव शर्मा बताउँछन् । 
 
कोरोना संक्रमणको प्रभाव जति लम्बिँदै जान्छ, त्यति नै हलहरु बन्द हुने क्रम बढ्ने उनको भनाइ छ । “सिनेमा हल बन्द हुने क्रम अझै रोकिँदैन । अझै कति समय अवस्था सहज नहुने हो भन्ने यकिन छैन,” महासचिव शर्मा भन्छन्, “निषेधाज्ञा पूर्णरूपमा खुलेर हल खोल्ने अनुमति पाएपछि पनि चलचित्र क्षेत्र कहिले सामान्य अवस्थामा आउँछ भन्ने थाहा छैन । त्यसैले हलहरु बन्द हुने क्रम अझै रोकिँदैन । बन्द हुने क्रम रहिरहने छ ।” बन्द हुने हलको संख्या कम्तीमा ४० पुग्ने उनी बताउँछन् ।  
 
कोरोना संक्रमण फैलिनु अगाडि नेपालमा १९३ वटा स्क्रिन थिए । १६ महिनादेखि यी हल बन्द छन् । 

अब रिलिज हुने चलचित्रलाई २८ वटा सिनेमा हल बन्द हुँदा ठूलो घाटा बेहोर्नु पर्नेछ । काठमाडौंकै कुमारी, जय नेपाल, गोपीकृष्णकै चारवटा हल बन्द हुनु मेकरका लागि पनि ठूलो घाटा भएको अशोक बताउँछन् ।  

सोह्र महिना सिनेमा हल बन्द हुँदा चलचित्र क्षेत्रलाई १८ अर्ब घाटा