दाङ । लुम्बिनी प्रदेशमा विपत्बाट एक वर्षमा ७८ जनाको मृत्यु भएको छ । आर्थिक वर्ष २०७७/०७८ को साउनदेखि असार अन्तिमसम्ममा ७८ जनाको मृत्यु भएको हो । त्यसमध्ये दाङमा सबैभन्दा धेरै ४९ जनाले ज्यान गुमाए ।

आन्तरिक मामिला तथा कानुन मन्त्रालय लुम्बनी प्रदेश विपत् व्यवस्थापन कोषका अनुसार आगलागी, बाढी–पहिरोलगायत विपत्का घटनाबाट मृत्यु भएको हो । यहाँ एक वर्षमा ६९० वटा विपत्का घटना भएका थिए । तीमध्ये सबैभन्दा धेरै ३८१ वटा आगलागीका घटना भए । जसका कारण १५ को मृत्यु र ४२ जना घाइते भएका थिए ।

प्रदेश विपत् व्यवस्थापन कोषका सूचना अधिकारी बाबुराम पन्थीले लुम्बनी प्रदेशमा एक वर्षको अवधिमा सर्पको टोकाइबाट ६ जनाको मृत्यु भएको जानकारी दिए । उनका अनुसार सर्पको टोकाइबाट २२ जना घाइते भएका थिए ।

लुम्बिनीमा यो अवधिमा बाढीमा परी चारजनाको मृत्यु, ६ घाइते र चारजना बेपत्ता छन् । त्यस्तै, पहिरोमा परी १६ जनाको मृत्यु, १३ घाइते र एकजना बेपत्ता छन् । भारी वर्षाका कारण चारजनाको मत्यु र १० जना घाइते भएको सूचना अधिकारी पन्थीले जानकारी दिए ।

उनका अनुसार फ्लैस बाढीबाट दुईजनाको मृत्यु भएको छ । त्यस्तै, बिजुली (करेन्ट) लागेर सातजनाको मृत्यु र ४५ जना घाइते भएका थिए ।

प्रदेशमा पशु–घटनाबाट १२ जनाको मृत्यु र १३ जना घाइते भएका थिए । अरु विभिन्न १२ वटा घटना गरी लुम्बिनी प्रदेशमा विपत्बाट ७८ जनाको मृत्यु भएको हो । २१९ जना घाइते भएका थिए ।

लुम्बिनी प्रदेशमा विपत्बाट अघिल्लो आर्थिक वर्षमा १७० जनाको मृत्यु भएको थियो ।

दाङमा ४९ जनाको मृत्यु
दाङमा यो वर्ष विपत्बाट ४९ जनाको मृत्यु भएको छ । आर्थिक २०७७/०७८ मा जिल्लामा ३१२ वटा विपत्का घटना भएका थिए । जसबाट ४९ जनाको मृत्यु भएको जिल्ला आपत्कालीन कार्य सञ्चालन केन्द्र दाङका प्रमुख विश्व अर्यालले जानकारी दिए । विपत्का घटनाबाट २६ जना घाइते भएका थिए ।

दाङमा अघिल्लो आर्थिक वर्षमा विपत्बाट ४८ जनाको मृत्यु भएको थियो ।

विपत् कोषको दुई करोड ७३ लाख ६ हजार खर्च
लुम्बिनी प्रदेश सरकारले विपद् व्यवस्थापन कोषको कुल सात करोड ५५ लाख सात हजार ३८६ रुपैया मौज्दात रकममध्ये दुई करोड ७३ लाख ६ हजार रुपैयाँ खर्च भएको जनाएको छ । व्यवस्थापन कोषका सूचना अधिकारी बाबुराम पन्थीका अनुसार विपत्बाट क्षति भएका ४५३ घरधुरीका लागि दुई करोड २० लाख ४५ हजार रुपैयाँ राहत रकम वितरण गरिएको छ ।

त्यस्तै, व्यवसाय क्षतिका लागि चार लाख ६१ हजार र विपत्बाट मृत्यु भएकाका २५ घरपरिवारलाई २५ लाख रुपैयाँ राहत रकम वितरण गरिएको छ ।