चितवन । चितवनमा खुकुलो गर्दै एक साताको लागि निषेधाज्ञा थप गरिएको छ ।

आज जिल्ला प्रशासन कार्यालयले आदेश जारी गर्दै यही असार १७ गतेसम्म निषेधाज्ञा थप गरिएको हो । यसअघि थप गरिएको निषेधाज्ञा भोलि सकिँदै छ ।

जिल्लामा कोभिड–१९ संक्रमणको जोखिम कायमै रहेको र यसको न्यूनीकरण र रोकथामका लागि निषेधाज्ञा थप गरिएको जारी आदेशमा जनाइएको छ । अघिल्ला निषेधाज्ञाभन्दा थप गरिएको निषेधाज्ञा केही खुकुलो गरिएको छ ।

अधिकांश व्यापार–व्यवसाय स्वास्थ्य मापदण्ड पालना गर्दै दैनिक मध्याह्न १२ देखि अपराह्न ४ बजेसम्म सञ्चालन गर्न पाइनेछ । यस्तै, मालपोत, नापी, यातायात व्यवस्था कार्यालयलगायत सरकारी कार्यालयहरुमा न्यूनतम कर्मचारी राखेर स्वास्थ्य मापदण्ड पालना गर्दै सञ्चालन गर्न पाइने आदेशमा उल्लेख छ ।

निजी सवारी–साधन जोर–बिजोर प्रणालीमा ५० प्रतिशत यात्रु क्षमतामा चलाउन पाइनेछ । सार्वजनिक सवारी–साधनमा लगाइएको रोक भने खुलाइएको छैन ।

दोस्रो लहरमा जारी निषेधाज्ञा योसमेत गरी सातौँपटक थपिएको हो । गएको वैशाख १६ गतेदेखि चितवनमा निषेधाज्ञा जारी गरिएको थियो ।