काठमाडौं । पूर्वमन्त्रीसमेत रहेका पूर्वमाओवादी नेताहरू टोपबहादुर रायमाझी र प्रभु साह शुक्रबार निर्वाचन आयोग पुगे । 

उनीहरूपछि माओवादीका नेताहरू दिनानाथ शर्मा, रामनारायण बिँडारी, लिलामणि पोखरेल र मुक्ति प्रधान पनि आयोग पुगेका थिए । तर, उनीहरू छुट्टाछुट्टै कामले आयोग पुगेका हुन् ।

पूर्वमाओवादीका नेताहरू माओवादी केन्द्रले आफूहरूलाई गरेको कारबाहीको विवरण लिन आयोग पुगेका हुन् । 

“हामीलाई कारबाही गरेको के–के डकुमेन्ट यहाँ आएको छ ? केन्द्रीय कमिटीबाट हटाएको छ कि छैन भनेर हेर्न आउनुभएको रहेछ,” आयोग स्रोतले भन्यो,” तर, आयोगमा माओवादीले केन्द्रीय कमिटीबाट हटाएको विवरण अनुसूची अनुुसार आएको छैन । कुन विधानबाट हटाएको रहेछ भन्ने प्रश्न पनि रहेछ । उहाँहरूले कारबाही गरेको विधान पनि लैजानुभयो ।”

रायमाझी र शाह सांसद पदबाट कारबाही गरेकोविरुद्ध अदालत जाने संकेत गरेको अर्का अधिकारीले जानकारी दिए ।  उनीहरूसहित नेताहरू लेखराज भट्ट, गौरीशंकर चौधरी कारबाहीमा परेपछि सांसद पद गुमेको थियो । 

“आयोगमा उनीहरूले प्रष्ट कुरा नगेरको र सांसदबाट कारबाही गरेको विषयमा अदालत जान खोजेको हु्नसक्छ,” स्रोतले भन्यो । 

उता, माओवादीका नेताहरू भने पार्टी फेरेपछि कारबाहीमा परेका स्थानीय तहका पदाधीकारीहरूको सूचना निकाल्न ढिलाइ भएकोबारे जान्न आयोग पुगेका थिए । स्थानीय तहका पदाधीकारीलाई कारबाही गरेको सूचना निकाल्ने प्रक्रिया किन अघि नबढाएको भन्दै प्रश्न गरिएको प्रधानले जानकारी दिए ।