काठमाडौं । स्वास्थ्य तथा जनसंख्या मन्त्रालयले विवाह, ब्रतबन्ध, उद्घाटन, भेलालगायत सार्वजनिक कार्यक्रमले गर्दा कोरोना संक्रमण नियन्त्रण हुन नसकेको जनाएको छ । संक्रमण नियन्त्रणका लागि समाजमा भइरहेका यस्ता कार्यक्रम घटाउन र संक्रमितहरु  समुदायमा सकेसम्म हिँडडुल नगर्न मन्त्रालयले आग्रह गरेको छ । 

“निषेधज्ञाको अझैपनि बुझी–नबुझी लुकिछिपि वा खुल्मखुल्ला उल्लंघन भइरहेको छ । अध्ययनहरुले अझै पनि जनस्वास्थ्यका मापदण्डहरुको राम्ररी पालना नभइरहेको र निषेधाज्ञाको समयमा पनि मानिसहरुको आवतजावतमा ५९ प्रतिशत मात्रै कमी भइरहेको पाइएको छ,” स्वास्थ्य मन्त्रालयको विज्ञप्ति जारी गर्दै भनेको छ, “महामारीको संक्रमणको रोकथाम नियन्त्रण मात्रै सबैभन्दा प्रभावकारी हुने भएकोले वैशाख ६ गतेको नेपाल सरकार (मन्त्रिपरिषद)को आदेश अनुसार जिम्मेवार निकायहरुबाट तोकिए अनुसार भूमिकाहरु बढाउनपर्ने भएको छ ।”

मन्त्रालयले संक्रमणको अवस्था अझै केही हप्ता चुनौतीपूर्ण हुने बताएको छ । निषेधाज्ञाका बाबजुद संक्रमण जति घट्नुपर्ने हो, त्यति नघटेको भन्दै अब केही हप्ता संयमित हुन सबैलाई मन्त्रालयले अनुरोध गरेको छ ।

“हाल विश्वको अनुभवलाई हेर्ने हो भने उपचार केन्द्रित भएर लागेका देशहरुभन्दा रोकथाममा लागेका देशहरुले मात्रै सफलता पाएका छन् । त्यसैले कोभिड–१९ को संक्रमण फैलिन नदिनु धेरै बुद्धिमानी देखिन्छ,” मन्त्रालयले भनेको छ, “जसका लागि व्यक्ति, नागरिक समाज, संघ संस्था, गैरसरकारी क्षेत्र सबै सरकारसंग हातेमालो गरि अघि बढनु आवश्यक छ । यो महामारीमा भाइरस विरुद्धको युद्ध स्वास्थ्य तथा जनसंख्या मन्त्रालय एक्लैको युद्ध होइन ।”

संक्रमण रोकथामका लागि अन्य मन्त्रालयहरु, प्रदेश र स्थानीय तह सबै सरकारी निकायहरुको पनि उतिकै महत्वपूर्ण भूमिका रहने स्वास्थ्य मन्त्रालयको भनाइ छ । “सीमित श्रोत साधनका बावजुद सेतो पोशाकमा सुसज्जित भगवान रुपी डाक्टर, नर्स तथा अन्य स्वास्थ्यकर्मीहरु दिनरात बिरामीहरुको सेवामा लागि रहनु भएको छ,” विज्ञप्तिमा उल्लेख छ ।