काठमाडौं । शिवरात्रिका लागि पशुपति क्षेत्र विकास कोषले तयारी पूरा गरेको छ । करिब दश लाख दर्शनार्थीलाई दर्शन गराउने गरी तयारी गरेको कोषले जनाएको छ ।

पशुपति क्षेत्र विकास कोषका सदस्य सचिव डा. प्रदीप ढकालका अनुसार शिवरात्रिका लागि कोषले ११ वटा समिति बनाएर फरकफरक जिम्मेवारी दिएको छ । ‘‘कोरोना महामारीका कारण गत वर्षभन्दा कम तयारी गरिएको छ,” उनले भने, ‘‘गत वर्ष पशुपतिका सबै ढोका फूलले सजिएका थिए । यस वर्ष भने सामान्य सजावट मात्रै हुनेछ । दर्शनार्थीलाई अनिवार्य स्वास्थ्य मापदण्ड पालना गरी प्रवेश दिइनेछ । मास्क लगाएर आउनुपर्नेछ । कोषले मास्क उपलब्ध गराउने छैन ।” 

कोषले शिवरात्रिमा दर्शनार्थीका लागि तीन ढोका खुला राखिने जनाएको छ । तीन ढोकाबाट भौतिक दूरी कायम गर्दै लाइनबद्ध दर्शन गराउनेछ । मित्रपार्क गौरीघाट, उमाकुण्ड दक्षिणमूर्ति हुँदै रुद्रगाडेश्वर उत्तरढोकाबाट एक लाइन, जयबागेश्वरी इँट्टापाखा भएर भुवनेश्वरीस्थित फलामको सानो ढोका हुँदै पश्चिमढोकाबाट अर्को लाइन गर्दै दर्शनार्थीलाई दर्शन गर्न खुला गर्ने भएको छ । बत्तीसपुतली गौशाला, एयरपोर्ट तिलगंगा, हुँदै पिंगलास्थानबाट चार शिवालय पञ्चदेवल हुँदै दक्षिणढोकाबाट एक-एक लाइन गरी दर्शनार्थीलाई दर्शन गराउने तयारी छ । 

कोषाध्यक्ष मिलनकुमार थापा पशुपतिनाथको दर्शन गर्नका लागि कोषले पाँच स्थानमा जुत्ता-चप्पलको व्यवस्थापन मिलाएको जानकारी दिए । उनले दक्षिणमूर्ति रुद्रगाडेश्वर दर्शनमार्ग, भुवनेश्वरीनजिक, वज्रघर दक्षिणतर्फ, राम मन्दिरनजिक वाग्मती पारी गरी पाँच स्थानमा जुत्ता-चप्पल व्यवस्थापन गर्न सकिने बताए । 

शिवरात्रिमा पशुपति क्षेत्रमा ९५ वटा संघ-संस्थाले भोजन सेवा दिने गरी तयार रहेको कोषले जनाएको छ । वनकाली र तिलगंगाको क्षेत्रलाई आवास क्षेत्र तोकेर नि:शुल्क भोजन, पानी चिया वितरण गर्ने व्यवस्था मिलाएको छ । 

कोषले कोरोना महामारीको संक्रमण कायमै रहेकाले स्वास्थ्य सुरक्षा मापदण्ड अनिवार्य गरेको छ, कोषका कार्यकारी निर्देशक घनश्याम खतिवडा बताउँछन् । ‘‘भौतिक दूरी कायम, स्यानिटाइजर र मास्क लगाएर मात्रै दर्शन गर्न दिने भएको छ । दर्शनार्थीले मास्क लगाएर दर्शन गर्न जानुपर्नेछ,” उनले भने, ‘‘साथै ३० वटा स्वास्थ्यसँग सम्बन्धित संस्थाले कोही  बिरामी भए उपचार गर्ने भएका छन् । डाक्टर, नर्स, औषधि, बेडसहितको सेनाको स्वास्थ्य शिविर राखिने जनाइएको छ । यस्तै एम्बुलेन्स र दमकल स्ट्यानबाइ राखिने भएको छ ।” 

ज्येष्ठ नागरिक र अपांगता भएका व्यक्क्तिलाई इलेक्ट्रिक ट्याम्पोमा दर्शन गराउने भएको छ । शिवरात्रिका लागि दर्शन नगराइ इलेक्ट्रिक ट्याम्पोमार्फत आवतजावत गराइने कोषले जनाएको छ । 

कोषले साधुसन्तका लागि नि:शुल्क भोजन, पानी, चिया तथा बसोबासको व्यवस्था मिलाएको जनाएको छ । साधुसन्तलाई चिसोबाट बच्नका लागि धुनीको व्यवस्था गरेको छ । कोषले प्रत्येक वर्ष साधुसन्तलाई बिदाइ गर्न बाटो खर्च स्वरुप छुट्टै दक्षिणा दिँदै आएको छ ।

कोषले सवारी पार्किङका लागि पाँच ठाउँ छनोट गरेको छ । तिलगंगा करिडोर, पशुपति क्षेत्र विकास कार्यालय अगाडि, महानगरीय ट्राफिक प्रहरी प्रभाग गौशाला, सिफल चौरको उपलब्ध ठाउँ र गुह्‌येश्वरी पारि पार्किङ गर्ने व्यवस्था रहनेछ । 

पशुपति क्षेत्र विकास कोषले शिवरात्रिमा करिब १५ हजार सुरक्षाकर्मी खटाउने भएको छ । पशुपति क्षेत्र विकास कोषका गठन भएको सुरक्षा व्यवस्था उपसमितिले सुरक्षा व्यवस्था मिलाउने भएको छ । जसअन्तर्गत नेपाल आर्मी, नेपाल प्रहरी, ट्राफिक प्रहरी, स्वयंसेवक परिचालन गरी शिवरात्रिमा सुरक्षा दिने जनाएको छ ।

पाशुपत क्षेत्रमा मासु-मदिरा तथा कुनै पनि प्रकारका नशालु पदार्थ बेचबिखन नगर्न कोषले आग्रह गरेको छ । पशुपति क्षेत्र विकास कोषले कोरोना महामारीका कारण कोषसँग प्रयाप्त रकम नभएकाले धेरै तयारी नगरेको जनाएको छ ।