काठमाडौं । प्रधानमन्त्री कप एकदिवसीय राष्ट्रिय क्रिकेट प्रतियोगितामा सुदूरपश्चिम प्रदेशले सान्त्वना जित निकालेको छ । आफ्नो अन्तिम खेलमा सुदूरपश्चिमले प्रदेश २ लाई ३ विकेटले हराएको हो ।

यसअघिका तीन खेलमा भने सुदूरपश्चिम पराजित भएको थियो । र्कीतिपुरस्थित त्रिवि क्रिकेट मैदानमा भएको खेलमा प्रदेश २ ले दिएको १९६ रनको लक्ष्य सुदूरपश्चिमले ३३ ओभरमा ७ विकेट गुमाएर पूरा गर्‍यो ।

सुदूरपश्चिमका लागि सन्जु धामीले अर्धशतकीय पारी खेले । ३५ बल खेलेका उनले ८ चौका र २ छक्काको सहयोगमा ५७ रन बनाए । त्यस्तै, खड्क बोहोराले ४३ रन बनाउँदा गजेन्द्र बोहोराले ३९ रनको योगदान गरे ।

बलिङतर्फ प्रदेश २ का लागि कुमार थापाले सर्वाधिक तीन विकेट लिए । त्यस्तै हरिशंकर शाहले दुई विकेट लिए । यसअघि, टस हारेर पहिले ब्याटिङ गरेको प्रदेश २ ले ४२ ओभरमा सम्पूर्ण विकेट गुमाउँदै १९५ रन बनाएको थियो ।

प्रदेश २ का लागि हरिशंकर शाहले अर्धशतकीय पारी खेले । ७३ बल खेलेका उनले ९ चौकाको सहयोगमा ६० रन बनाए । त्यस्तै, विवेक यादवले ४१ रन बनाउँदा मोहवुब आलमले २३ रन जोडे । हेरौं थप तस्बिर :