काठमाडौं । पुसको मध्य । काठमाडौंमा बिहान तुसारो पर्न थालेको छ । छोटो दिन ५ बजे नै अँध्यारो भइसक्छ । दिउँसै घाम अस्ताउँदै गर्दा चिसो उकालो चढ्छ । विस्तारै चिसो बढ्छ । उसो त काठमाडौंमात्र होइन, देशैभर चिसो छ ।
तर, काठमाडौंको सडक भने अहिले तातिँदो छ । पुस ५ गते संसद् विघटन भएपछि त्यसको विरुद्धमा दैनिकजसो प्रदर्शन भइरहेको छ । अझै केही दिन काठमाडौंको सडक आन्दोलनको रापले तात्ने देखिएको छ ।
आइतबार जनता समाजवादी पार्टीले प्रदर्शन गर्यो । सोमबार नेपाली कांग्रेसले १६५ निर्वाचन क्षेत्रमै विरोधसभा गर्यो । मंगलबार नेकपा प्रचण्ड–माधव नेपाल समूहको विरोधसभा भृकुटीमण्डपमा भयो । साझा विवेकशील पार्टीले पनि सडकमा आउने घोषणा गरिसकेको छ ।
संसद् विघटनको मुद्दामा फैसला हुन केही समय लाग्ने देखिँदा अझै सडक प्रदर्शन लम्बिने निश्चित छ । “संसद् पुनःस्थापना नभएसम्म हामी आन्दोलनमै हुन्छौँ,” भृकुटीमण्डपमा आयोजित सभामा बोल्दै नेकपा प्रचण्ड–माधव समूहका एक अध्यक्ष माधवकुमार नेपालले भने । नेपालको भनाइले पनि संसद् विघटनको मुद्दा छिनोफानो नभएसम्म सडकमा प्रदर्शन नरोकिने प्रष्ट संकेत गर्छ ।
संवैधानिक इजलासले संसद् विघटनबारे लिखित जवाफ मागेको छ । त्यस्तै, इजलासले नेपाल बार एसोसिएसन र सर्वोच्च बारबाट एमिकस क्युरी मगाएको छ । संवैधानिक इजलासले पुस १९ देखि लगातार सुनुवाइ गर्नेछ । यी सबै प्रक्रिया पूरा गरेर संसद् विघटनको मुद्दामा फैसला गर्दा छिटोमा पनि केही साता लाग्ने जानकारहरु बताउँछन् ।
अदालतले संसद् विघटनको टुंगो नलगाउँदासम्म सडकबाट दबाब दिइरहनुपर्नेमा संसद् विघटनको विपक्षमा रहेका दलहरु देखिएका छन् । जसपाका संघीय परिषद् अध्यक्ष डा. बाबुराम भट्टराईले संसद् विघटनको विपक्षमा जनता छन् भनेर देखाउन पनि सडक छाड्न नहुने बताइसकेका छन् ।
कांग्रेसभित्र पनि वरिष्ठ नेता रामचन्द्र पौडेल समूह एकदिने कार्यक्रमले नपुग्ने भन्दै चरणबद्ध आन्दोलन गर्नुपर्ने पक्षमा देखिएको छ ।
मंगलबार भृकुटीमण्डपमा आयोजित सभामा नेकपाका अध्यक्ष प्रचण्डले अर्को चरणको आन्दोलनको कार्यक्रम ल्याउने भन्दै सडक नछाड्ने बताएका छन् ।
लेखक, बुद्धिजीवीहरु पनि चरणबद्धरुपमा सडक प्रदर्शनमा छन् । बृहत् नागरिक आन्दोलन नाम दिइएको सो अभियानले संसद् विघटनविरुद्धमा माइतीघर मण्डलामा विरोध प्रदर्शन गरिरहेको छ ।
