काठमाडौं । विभागीय टोली एपीएफ नेपाली महिला क्रिकेटको सशक्त टोली हो । घरेलु प्रतियोगितामा एपीएफको वर्चस्व देख्न सकिन्छ । टिमलाई बलियो बनाउन खेलाडीहरुको महत्वपूर्ण भूमिका हुन्छ । सीता रानामगर त्यसको प्रमुख भूमिकामा छिन् । एपीएफकी कप्तान सीता हाल दाङको लमहीस्थित देउखुरी क्रिकेट मैदानमा जारी प्रधानमन्त्री कप महिला ट्वेन्टी–२० क्रिकेटमा सर्वाधिक रन बनाउने खेलाडी हुन् । सिजनको पहिलो अर्धशतक बनाउने खेलाडी पनि उनी नै हुन् ।

नेपाली राष्ट्रिय महिला क्रिकेट टोलीको उपकप्तानसमेत रहेकी सीताको आइतबारको खेल पनि हेर्न लायक रहयो । प्रतियोगितामा दुई खेल खेलकी उनी दुवै खेलमा ‘प्लेअर अफ दी म्याच’ चुनिइन् । शनिबार भएको पहिलो खेलमा सीताले एपीएफका लागि अर्धशतकीय पारी खेलिन् । जसमा आठ चौका प्रहार गरेकी थिइन् ।

आइतबारको खेलमा पनि उनले ब्याटिङ र बलिङ दुवैतर्फ उत्कृष्ट प्रदर्शन गरिन् ।  ब्याटिङतर्फ १८ रन बनाउँदा बलिङतर्फ दुई विकेट लिइन् । लामो समयपछि मैदान फर्केकी सीता आफ्नो खेलप्रतिको समर्पण सोही स्तरको रहेको बताउँछिन् । नौ महिना घरमा बसेकी उनी पुनः मैदानमा फर्कंदा उत्साहित छिन् । आफ्नो प्रदर्शनबाट खुसी छिन् ।

“लामो समय मैदानबाहिर रहेँ । खेल र प्रशिक्षणको माहोललाई मिस गरिरहेकी थिएँ । मैदान फर्कन पाउँदा धेरै खुसी मिलेको छ । खेलको पहिलो दिनमा नै राम्रो प्रदर्शन गर्न पाएँ । योभन्दा धेरै खुसी मेरो लागि केही हुँदैन,” सीताले बाह्रखरीसँगको कुराकानीमा भनिन् । विवाहपछि खेलमा सक्रियरुपमा नलाग्ने पनि छन् । तर, सीता मैदानमै छिन् । उत्कृष्ट प्रदर्शन गरिरहेकी छिन् । उनको प्रदर्शनको सर्वत्र चर्चा छ ।

“पहिलेभन्दा मेरो खेलमा केही सुधारिएको प्रदर्शन हुँदा म आफैँमा खुसी छु । आफूले भनेअनुरुप प्रदर्शन कहिले हुन्छ, कहिले सोचेभन्दा फरक । तर, विवाहपछि सोचेभन्दा उत्कृष्ट गर्न सकिएको छ । यही नै मेरो लागि खुसीको कुरा हो,” सीताले भनिन् । अघिल्लो खेलमा कस्तो प्रदर्शन गर्न सकिन्छ भन्ने कुरामा उनी चनाखो  छिन् । साविक विजेता एपीएफसामु उपाधि रक्षा गर्नुपर्ने चुनौती छ ।

तर, आफ्नो टोलीले मिहिनेत गरेर उत्कृष्ट प्रदर्शन गर्नेमा कप्तान सीता आशावादी छिन् ।

“हाम्रो  अहिले मुख्य योजना उत्कृष्ट प्रदर्शन गर्नेमा छ । प्रदर्शन राम्रो भयो भने नतिजा राम्रो आउनेमा कुनै दुईमत छैन । दुई टोलीसँगको प्रदर्शनमात्र नहेरेर आगामी खेलहरुमा राम्रो टोलीसँग कस्तोे खेल प्रदर्शन गर्ने भन्ने योजनामा छौँ । हामी सफल बन्छौँ भन्ने पूर्ण विश्वास छ । त्यसको लागि  उत्कृष्ट प्रदर्शनको खाँचो छ,” सीताले भनिन् ।