काठमाडौं । पूर्वप्रधानमन्त्री एवं नेकपाका वरिष्ठ नेता माधवकुमार नेपालले प्रधानमन्त्री केपी शर्मा ओलीले पार्टीभित्र बहुमत गुमाइसकेको बताएका छन् । 

उनले संसद विघटन गर्ने प्रधानमन्‍त्री ओलीको  सिफारिस संविधानको भावनाविपरीत रहेको बताएका छन् । ‘‘संसदीय दलमा पनि विश्वास छैन । राष्ट्रपतिकहाँ मन्त्रीसहित ९५ जना सांसद्‌को हस्ताक्षरसहित आवेदन बुझाएका छौं । संसदीय दलमै बहुमत छैन,’’ नेता नेपालले भने, ‘‘संसदभित्र नेपाली कांग्र]स तथा जनता समाजवादी पार्टीसहित जोड्दा ओलीको विपक्षमा अत्याधिक बहुमत छ ।’’

उनले कोही पनि संसद् विघटनको पक्षमा नरहेको बताएका छन् । ‘‘हामी छैनौं । नेकपा दलमा पनि यसबारे छलफल गरिएको छैन । यो अस्वभाविक कदम हो,’’ उनले भने, ‘‘निन्दनीय, भर्त्सनायोग्य, लज्जास्पद छ । ओलीको कदमले लोकतन्त्रमाथि गम्भीर आघात पुर्‍याएको छ । लोकतन्त्रलाई बलियो बनाउनुपर्ने अवस्थामा यस्तो निर्णय गरियो ।’’

उनका अनुसार आज १ बजे नेकपाको बैठक छ । ‘‘उहाँ त्यहाँ आउनुपर्ने थियो, आफ्ना कुरा राख्नुपर्ने थियो । हठात निर्णय गर्नुभयो । गलत हो र अस्वीकार्य छ,’’ वरिष्ठ नेता नेपालले भने ।