काठमाडौं । नेपाल सरकारलाई विकास साझेदारबाट प्राप्त हुने वैदेशिक सहायता प्रतिबद्धतामा उल्लेख्य वृद्धि भएको छ । अर्थ मन्त्रालयका अनुसार चालु आर्थिक वर्ष २०८१/८२ को पुस पहिलो हप्तासम्ममा दुई खर्ब दुई अर्ब ४० करोड रुपैयाँ बराबरको वैदेशिक सहायता प्रतिवद्धता प्राप्त भएको छ । 

गत आर्थिक वर्ष २०८०/८१ को सोही अवधिमा ५९ अर्ब ९८ करोड रुपैयाँ बराबरको वैदेशिक सहायता प्रतिवद्धता प्राप्त भएको थियो । गत आर्थिक वर्षको पहिलो पाँच महिनाको तुलनामा चालु आर्थिक वर्षमा प्राप्त वैदेशिक सहायता प्रतिबद्धता २३७.५ प्रतिशतले बढेको अर्थ मन्त्रालयका प्रवक्ता महेश भट्टराईले जानकारी दिए ।

प्रवक्ता भट्टराईका अनुसार यस अवधिमा वैदेशिक अनुदान प्रतिवद्धता १५३.१ प्रतिशतले र वैदेशिक ऋण प्रतिबद्धता २८०.६ प्रतिशतले बढेको छ । 

चालु आर्थिक वर्षको हालसम्मको अवधिमा प्राप्त वैदेशिक सहायता पनि गत वर्षको सोही अवधिको तुलनामा ३०.३ प्रतिशतले वृद्धि भएको छ । 

अर्थ मन्त्रालयका प्रवक्ताका अनुसार यस अवधिमा वैदेशिक अनुदान ६ अर्ब ७५ करोड रुपैयाँ र वैदेशिक ऋण ३७ अर्ब ३३ करोड रुपैयाँ समेत जम्मा ४४ अर्ब ८ करोड रुपैयाँ वैदेशिक सहायता प्राप्त भई विभिन्न विकास निर्माणमा प्रयोग भएको छ ।