काठमाडौं । संविधानविद् डा. विपिन अधिकारीले प्रधानमन्त्री केपी ओलीलाई प्रतिनिधिसभा विघटनका लागि सिफारिस गर्ने अधिकार नै नभएको बताएका छन् । बाह्रखरीसँग कुरा गर्दै उनले प्रधानमन्त्रीले असंवैधानिक कदम चालेका र यसको  संविधानअन्तर्गत कुनै आधार नभएको बताए ।

“प्रतिनिधिसभा अहिले पनि सरकार निर्माण गर्न समर्थ छ । यदि प्रधानमन्त्रीले प्रतिनिधिसभामा विश्वासको मत लिन सक्दिनँ भन्ने लाग्दछ वा अविश्वासको प्रस्तावलाई फेस गर्न नसक्ने लाग्दछ भने उहाँले राजीनामा गर्न सक्नुहुन्छ । तर, प्रतिनिधिसभा भंग गर्ने उहाँको अधिकार  छैन,” उनले भने, “ तपाईंले संविधानको कुन धाराअन्तर्गत यो सिफारिस गर्नुभयो ? भनेर राष्ट्रपतिले प्रधानमन्त्रीलाई बोलाएर सोध्नुपर्छ । त्यो सिफारिस उहाँले देखाउनै सक्नुहुन्न ।”

त्यस्तै अधिकारीले थप भने, “अर्को कुरा, उहाँले प्रतिनिधिसभा विघटन गर्ने भनेको संसद्‌मा भएका पार्टीलाई घर फर्काउने हो । जनतासमक्ष फर्काउने हो । जबसम्म उनीहरुले वैकल्पिक सरकार बनाउने अवसर पाउँदैनन् , तबसम्म उनीहरुलाई जनतामा जाऊ भन्ने अवस्था नै आउँदैन ।” प्रधानमन्त्रीको सिफारिस असंवैधानिक रहेकाले अदालत गए तत्कालै बदर हुने पनि उनले बताए ।